چوہدری شافع حسین کا ٹیکسٹائل سیکٹر سے وابستہ چین کی کمپنی کے وفد کے ہمراہ قائد اعظم بزنس پارک شیخوپورہ کا دورہ

جمعرات 17 جولائی 2025 16:49

لاہور(اُردو پوائنٹ اخبارتازہ ترین - این این آئی۔ 17 جولائی2025ء)صوبائی وزیر صنعت و تجارت چوہدری شافع حسین نے ٹیکسٹائل سیکٹر سے وابستہ چین کی کمپنی کے وفد کے ہمراہ قائد اعظم بزنس پارک شیخوپورہ کا دورہ کیا۔چین کی سپریم انٹیلجنٹ ٹیکنالوجی کمپنی کے سی ای او مسٹر لیو کیان اور کمپنی کے دیگر حکام صوبائی وزیر کے ہمراہ تھے۔چیئرمین پیڈمک جاوید اقبال نے صنعتی انفراسٹرکچر اور گارمنٹ سٹی پر پیش رفت بارے بریفنگ دی۔

سی ای او پیڈمک کیپٹن ریٹائرڈ شعیب علی اور دیگر حکام بھی اس موقع پر موجود تھے۔صوبائی وزیر نے وفد کے ہمراہ گارمنٹ سٹی میں زیر تعمیر یونٹس اور گورنمنٹ ٹیکنیکل ٹریننگ انسٹی کا بھی معائنہ کیا ۔انہوں نے گورنمنٹ ٹیکنیکل ٹریننگ انسٹی ٹیوٹ میں سٹیچنگ یونٹس کا بھی مشاہدہ کیا۔

(جاری ہے)

صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہاکہ پنجاب کے سپیشل اکنامک زونز معاشی ترقی کے انجن ہیں،یہاں سرمایہ کاری پر ملکی اور غیر ملکی سرمایہ کاروں کو خصوصی مراعات حاصل ہیں۔

چوہدری شافع حسین نے کہاکہ وزیر اعلیٰ کی ہدایت پر بننے والا گارمنٹ سٹی ٹیکسٹائل سیکٹر کے فروغ میں معاون ثابت ہوگا۔گارمنٹ سٹی میں چین کی ٹیکسٹائل انڈسٹری اور ٹیکنالوجی منتقل ہوگی۔ پلگ اینڈ پلے ماڈل پر بننے والا گارمنٹ سٹی سولر انرجی پر ہوگا۔حکومت گارمنٹ سٹی میں صنعتی یونٹس کیلئے عمارات بنا کر رینٹ پر دے گی۔گارمنٹ سٹی میں ٹیکسٹائل سیکٹر سے وابستہ ملکی سرمایہ کار بھی کارخانے لگائیں گے۔

صوبائی وزیرصنعت و تجارت نے کہاکہ پنجاب میں نئی انڈسٹری لگنے سے مقامی لوگوں کو روزگار کے نئے مواقع مل رہے ہیں۔ٹیونا کے زیر اہتمام گارمنٹ سٹی میں سٹیٹ آف دی آرٹ ٹیکنیکل ٹریننگ انسٹی ٹیوٹ بن رہا ہے،یہاں طالبات کو سٹیچنگ کے 3ماہ کے کورسز کروائے جارہے ہیں۔چوہدری شافع حسین نے کہاکہ طالبات کیلئے پک اینڈ ڈراپ کی سہولت کے ساتھ تربیت مکمل کرنے والی خواتین کے لئے ملازمت بھی یقینی بنائی جارہی ہے۔

صوبائی وزیر نے قائد اعظم بزنس پارک شیخوپورہ میں ترقیاتی کاموں کی رفتار مزید تیز کرنے کی ہدایت کی۔چین کی کمپنی کے سی ای او نے قائد اعظم بزنس پارک میں صنعتی انفراسٹرکچر اور گارمنٹ سٹی کو سراہا۔وفد کے سربراہ نے اپنی کمپنی کے گارمنٹ پراجیکٹس بارے آگاہ کیا۔چین کے گروپ نے گارمنٹ سٹی میں اپنا یونٹس لگانے کا عندیہ دیا۔