ڈپٹی کمشنر کی زیر صدارت اجلاس، ویسٹ مینجمنٹ کمپنی کی کارکردگی اور صفائی آپریشنز کا تفصیلی جائزہ لیا گیا

جمعرات 17 جولائی 2025 19:01

فیصل آباد (اُردو پوائنٹ اخبارتازہ ترین - اے پی پی۔ 17 جولائی2025ء) ستھرا پنجاب مہم کے تحت شہری و دیہی علاقوں میں صفائی کے یکساں نظام کو مؤثر اور عملی طور پر نافذ کرنے کیلئے ڈپٹی کمشنر کیپٹن (ر) ندیم ناصر کی زیر صدارت اہم اجلاس منعقد ہواجس میں ویسٹ مینجمنٹ کمپنی کی کارکردگی اور صفائی آپریشنز کا تفصیلی جائزہ لیا گیا۔اجلاس میں سی ای او ویسٹ مینجمنٹ کمپنی عبدالروف، اسسٹنٹ کمشنر صدر ڈاکٹر ذوالقرنین، دیگر متعلقہ افسران اور اسسٹنٹ کمشنرز سمندری، تاندلیانوالہ، جڑانوالہ، چک جھمرہ نے ویڈیو لنک کے ذریعے شرکت کی۔

ڈپٹی کمشنر نے ہدایت کی کہ شہری علاقوں میں صفائی کے بہترین انتظامات یقینی بنائے جائیں اور ستھرا پنجاب مہم کے تمام اہداف پر عمل درآمد مؤثر انداز میں کیا جائے۔

(جاری ہے)

انہوں نے ویسٹ مینجمنٹ کمپنی کو تاکید کی کہ ورکرز کی فیلڈ میں حاضری اور کارکردگی کو باقاعدگی سے مانیٹر کیا جائے اور اس سلسلے میں کوئی غفلت برداشت نہیں کی جائیگی۔یونین کونسل سیکرٹریز شہریوں کی صفائی سے متعلق شکایات روزانہ کی بنیاد پر حل کر کے پورٹل پر اپلوڈ کریں۔

انہوں نے کہا کہ صفائی ورکرز کے سوشل سیکیورٹی کارڈز فوری طور پر بنوائے جائیں تاکہ انہیں تمام قانونی سہولیات میسر آ سکیں۔ڈپٹی کمشنر نے ستھرا پنجاب مہم کے ورکرز کو تنخواہوں کی بروقت ادائیگی کے حوالے سے بینک کی تفصیلی رپورٹ بھی طلب کر لی۔ انہوں نے کہا کہ صفائی کے معاملے میں کسی قسم کی نرمی یا کوتاہی برداشت نہیں کی جائے گی اور روزانہ کی بنیاد پر کمپنی کی کارکردگی کی مانیٹرنگ کی جارہی ہے۔

دیہی علاقوں میں صفائی کے معیار کو بہتر بنانے کیلئے انہوں نے متعلقہ حکام کو ہدایت دی کہ سیوریج نالوں کی باقاعدہ ڈی سلٹنگ کے ساتھ ساتھ عمومی صفائی پر بھی بھرپور توجہ دی جائے تاکہ شہریوں کو صحت مند ماحول میسر آ سکے۔اجلاس میں شریک افسران نے ڈپٹی کمشنر کو اپنے اپنے علاقوں میں صفائی مہم کے سلسلے میں جاری اقدامات سے آگاہ کیا اور مکمل تعاون کی یقین دہانی کرائی۔