Live Updates

پاک بنگلا دیش سیریز ، بارش کے رنگ میں بھنگ ڈالنے کا خطرہ منڈلانے لگا

پاکستانی ٹیم جعمہ کے روز ٹریننگ کا آغاز کرے گی

ذیشان مہتاب جمعہ 18 جولائی 2025 11:44

پاک بنگلا دیش سیریز ، بارش کے رنگ میں بھنگ ڈالنے کا خطرہ منڈلانے لگا

ڈھاکا (اردو پوائنٹ تازہ ترین اخبار ۔ 18 جولائی 2025ء ) پاک بنگلا دیش سیریز میں بارش کے رنگ میں بھنگ ڈالنے کا خطرہ منڈلانے لگا۔

پاکستان اور بنگلا دیش کے درمیان 3 ٹی 20 میچز کی سیریز کا آغاز اتوار سے ہورہا ہے جس کے بارش سے متاثر ہونے کا خدشہ ظاہر کیا جارہا ہے، پاکستان ٹیم بدھ کے روز ہی میزبان شہر ڈھاکا میں ڈیرے ڈال چکی ہے جبکہ اس نے جمعرات کے روز مکمل آرام کیا، جعمہ کے روز گرین شرٹس ٹریننگ کا آغاز کریں گے۔

دوسری جانب بنگلا دیشی ٹیم نے سری لنکا کو اس کے ملک میں ٹی 20 سیریز میں 1-2 سے شکست دے کر اپنا اعتماد بلند کرلیا ہے تاہم کپتان لٹن داس اپنا ہوم گراؤنڈ ہونے کے باوجود پاکستان کو آسان نہیں سمجھتے بلکہ انہوں نے آنے والی سیریز کو انتہائی چیلنجنگ قرار دے دیا ہے۔

(جاری ہے)

میڈیا سے بات چیت میں لٹن داس کا کہنا تھا کہ ہم نے پہلے ویسٹ انڈیز کو اس کے ملک اور اب سری لنکا کو ان کے ہوم گراؤنڈ پر زیر کیا ہے، یہ دونوں سیریز فتوحات بہت زیادہ اہمیت رکھتی ہیں مگر اب ہمارا پاکستان سے اپنے ہوم گراؤنڈ پر مقابلہ ہے۔

انہوں نے کہا کہ گرین شرٹس کو میرپور میں تو بالکل بھی آسان خیال نہیں کرتے، ان کے پاس بہترین بولنگ اٹیک موجود ہے اور وہ ہماری کنڈیشنز سے بھی اچھی طرح آشنا ہیں۔

لٹن داس نے کہا کہ پاکستان کے اکثر کھلاڑی بنگلا دیش پریمیئر لیگ کی وجہ سے یہاں پر میچز کھیل چکے ہیں، اس کے باوجود ہم سمجھتے ہیں کہ اگر ہم نے اسمارٹ کرکٹ کھیلی تو آنے والی سیریز بھی جیت سکتے ہیں۔

لٹن داس نے بھی پاکستان کے خلاف سیریز کے دوران پچ کے برتاؤ کے حوالے سے غیریقینی ظاہر کرتے ہوئے کہا کہ میں نہیں جانتا کہ میرپور کی وکٹ پاکستان سے سیریز میں کس طرح کی ثابت ہوگی، میرے خال میں ڈھاکا میں ہرروز بارش ہورہی ہے، اس لیے میں سمجھتا ہوں کہ ایسے موسم میں وکٹ بیٹنگ کیلیے کافی دشوار ہوسکتی ہے۔

یاد رہے کہ بنگلا دیش نے بدھ کے روز کولمبو میں سری لنکا کو تیسرے اور آخری ٹی 20 میچ میں 8 وکٹ سے شکست دے کر پہلی بار آئی لینڈ میں سیریز جیتنے کا کارنامہ انجام دیا تھا، اس فتح میں مہدی حسن کی عمدہ بولنگ نے اہم کردار ادا کیا، اس کے ساتھ لٹن داس کو بھی ملک سے باہر بنگلا دیش کو 2 سیریز جتوانے والے کپتان کا اعزاز بھی حاصل ہوگیا، اس سے قبل گذشتہ برس دسمبر میں ان کی قیادت میں بنگلہ دیش نے ویسٹ انڈیز میں 0-3 سے سیریز اپنے نام کی تھی۔

بنگال ٹائیگرز کی سری لنکا سے جمعرات کو وطن واپسی ہوئی، کھلاڑی جمعہ کو آرام کریں گے جبکہ آنے والی سیریز کیلیے انہیں ہفتے کے پریکٹس کا موقع میسر آئے گا۔

بنگلہ دیش نے پاکستان سے سیریز کیلیے سری لنکا کے خلاف کامیابی سمیٹنے والے اسکواڈ کو ہی برقرار رکھا ہے۔ اسکواڈ میں کپتان لٹن داس، تنزید حسن، پرویز حسین، محمد نائم، توحید ہریدوئے، جاکر علی، شمیم حسین، مہدی حسن میراز، رشد حسین، مہدی حسن، نوسم احمد، تسکین احمد، مستفیض الرحمان، شریف الاسلام، تنظیم حسن ثاقب اور محمد سیف الدین شامل ہیں۔