سوات ،پختون سٹوڈنٹس فیڈریشن کے زیر اہتمام پریس کلب میں تعزیتی ریفرنس

خانزیب شہید پختونوں کے دلوں میں زندہ ہیں، مشن کو ہر قیمت پر جاری رکھیں گے،اے این پی

جمعہ 18 جولائی 2025 19:20

سوات (اُردو پوائنٹ اخبارتازہ ترین - این این آئی۔ 18 جولائی2025ء)پختون اسٹوڈنٹس فیڈریشن کے زیر اہتمام سوات پریس کلب میں مولانا خانزیب شہید کی یاد میں تعزیتی ریفرنس کا انعقاد کیا گیا، جس میں عوامی نیشنل پارٹی سوات کے ضلعی قائدین، کارکنوں اور پختون اسٹوڈنٹس فیڈریشن کے طلبا نے بڑی تعداد میں شرکت کی۔ریفرنس سے خطاب کرتے ہوئے عوامی نیشنل پارٹی ضلع سوات کے صدر شیر شاہ خان، جنرل سیکرٹری عبدالمالک، ایڈیشنل جنرل سیکرٹری اکرام خان، ملگری وکیلان کے نائب صدر حبیب شمع خیل، ظاہر رور جان، پختون اسٹوڈنٹس فیڈریشن کے صدر حارث باچہ اور دیگر مقررین نے کہا کہ مولانا خانزیب شہید پختون قوم کے سچے سپاہی تھے، جنہوں نے ہر فورم پر پختونوں کی بے باک ترجمانی کی اور بدامنی کے خلاف جرت مندانہ جدوجہد کرتے ہوئے اپنی جان کا نذرانہ پیش کیا۔

(جاری ہے)

مقررین نے کہا کہ شہید کی جو موت ہے وہ قوم کی حیات ہے، اور خانزیب شہید کا مشن ہم سب کا مشن ہے، جسے مکمل کرنے کے لیے کسی بھی قربانی سے دریغ نہیں کیا جائے گا۔ وہ امن کے شہید ہیں اور قوم کیلئے باعث افتخار ہیں۔رہنمائوں نے کہا کہ خانزیب شہید نے پختون قوم کے حقوق کیلئے آواز اٹھاتے ہوئے ظلم و جبر کے خلاف تحریک چلائی اور اپنی زندگی قوم کیلئے وقف کی۔ ان کے لواحقین کے غم میں ہم برابر کے شریک ہیں اور انہیں کبھی تنہاء نہیں چھوڑیں گے۔تقریب کے اختتام پر شہید کے ایصالِ ثواب کیلئے اجتماعی دعا کی گئی۔