دریائے سندھ میں کالا باغ ،چشمہ کے مقام پر فلڈ بارے الرٹ جاری

کالا باغ اور چشمہ کے مقام پر اونچے درجے کے سیلاب کا خدشہ ہے‘ پی ڈی ایم اے

جمعہ 18 جولائی 2025 20:50

دریائے سندھ میں کالا باغ ،چشمہ کے مقام پر فلڈ بارے الرٹ جاری

لاہور(اُردو پوائنٹ اخبارتازہ ترین - این این آئی۔ 18 جولائی2025ء)پروونشل ڈیزاسٹر مینجمنٹ اتھارٹی نے دریائے سندھ میں کالا باغ اور چشمہ کے مقام پر فلڈ بارے الرٹ جاری کر دیا۔ دریائے سندھ میں کالا باغ اور چشمہ کے مقام پر اونچے درجے کے سیلاب کا خدشہ ہے۔ اگلے 24 گھنٹوں میں دریائے سندھ میں کالا باغ اور چشمہ کے مقام پر سیلابی صورتحال بن سکتی ہے۔ کمشنر سرگودھا اور ڈیرہ غازی خان کو ممکنہ صورتحال بارے الرٹ جاری کیا گیا۔

میانوالی، بھکر، لیہ، کوٹ ادو، ڈیرہ غازی خان، مظفرگڑھ اور راجن پور کے ڈپٹی کمشنرز کو الرٹ جاری کیا گیا۔ پی ڈی ایم اے نے ریسکیو 1122 کو تمام تر انتظامات پیشگی مکمل کرنے کی ہدایات جاری کیں۔ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو الرٹ جاری کر دیا گیا ہے۔

(جاری ہے)

ڈی جی پی ڈی ایم اے عرفان کاٹھیا نے متعلقہ انتظامیہ کو الرٹ رہنے کی ہدایات کیں۔

ڈائریکٹر جنرل پی ڈی ایم اے عرفان علی کاٹھیا کا کہنا تھا کہ وزیر اعلی پنجاب کی ہدایات کے پیش نظر تمام تر انتظامات پیشگی مکمل کریں۔ ایمرجنسی کنٹرول رومز میں سٹاف کو الرٹ رکھا جائے۔ ریسکیو 1122 کی ڈائزاسٹر رسپانس ٹیموں کو بھی ہائی الرٹ رکھا جائے۔ ریسکیو آپریشن کے لیے پٹرول و ڈیزل کا اسٹاک وافر مقدار میں ہونا چاہیے۔ عوام الناس کو موجودہ صورتحال سے لمحہ بہ لمحہ آگاہ رکھا جائے۔

دریاں کے پاٹ میں موجود مکانوں اور مویشیوں کے انخلا کو یقینی بنائیں۔ فلڈ ریلیف کیمپس میں خوراک، پینے کے صاف پانی و دیگر سہولیات کی فراہمی کو یقینی بنایا جائے۔ عوام جاری کردہ احتیاطی تدابیر پر عمل کریں۔ ہنگامی انخلا کی صورت میں انتظامیہ سے تعاون کریں۔ حکومت پنجاب آپکا اور آپکے مال مویشیوں کا پوری طرح سے خیال رکھے گی۔ شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔