میجرراجہ عزیز بھٹی نشان حیدر کی جرات و بہادری رہتی دنیا تک یاد رکھی جائے گی، وزیراعظم

جمعہ 12 ستمبر 2025 17:06

اسلام آباد (اُردو پوائنٹ اخبارتازہ ترین - این این آئی۔ 12 ستمبر2025ء)وزیراعظم محمد شہباز شریف نے کہا ہے کہ میجرراجہ عزیز بھٹی نشان حیدر نے جرات و بہادری کی ایسی مثال قائم کی جو رہتی دنیا تک یاد رکھی جائے گی۔

(جاری ہے)

میجر راجہ عزیز بھٹی شہید نشان حیدر کے 60ویں یوم شہادت پر انہیں خراج عقیدت پیش کرتے ہوئے وزیراعظم نے کہا کہ 1965 کی پاک بھارت جنگ کے دوران مسلسل پانچ دن تک دشمن کے حملوں کو پسپا کر کے میجر راجہ عزیز بھٹی شہید نشان حیدر نے دشمن کے لاہور پر قبضہ کرکے جشن منانے کے ناپاک عزائم کو خاک میں ملا دیا،میجر راجہ عزیز بھٹی شہید نشان حیدر اور ان کے اہل خانہ پر مجھ سمیت پوری قوم کو فخر ہے۔

وزیراعظم آفس کے میڈیا ونگ کی طرف سے جاری بیان کے مطابق وزیراعظم نے کہا کہ افواج پاکستان ارض وطن کے دفاع کیلئے دن رات مصروف عمل ہیں،جب بھی دشمن نے پاکستان کی طرف میلی آنکھ سے دیکھا پاک فوج کے افسران و جوانوں نیمیجر راجہ عزیز بھٹی شہید نشان حیدر کی طرح سیسہ پلائی دیوار بن کروطن عزیز کا تحفظ کیا۔ انہوں نے کہا کہ پاکستان کے تحفظ کے غیر متزلزل عزم میں مجھ سمیت پوری قوم اپنی بہادر افواج کے ساتھ شانہ بشانہ کھڑی ہے۔