Live Updates

آئی ایم ایف وفد 25 ستمبر سے 2 ہفتے کیلئے پاکستان کا دورہ کرے گا

جمعہ 12 ستمبر 2025 16:55

اسلام آباد (اُردو پوائنٹ اخبارتازہ ترین - این این آئی۔ 12 ستمبر2025ء)آئی آیم ایف کا وفد 25 ستمبر سے 2 ہفتے کیلئے پاکستان کا دورہ کرے گا، پہلے مرحلے میں تکنیکی مذاکرات ہوں گے، دوسرے مرحلے میں پالیسی سطح کے مذاکرات کیے جائیں گے، پاکستانی معیشت کے جائزے کے بعد آئی ایم ایف وفد تیسری قسط جاری کرنے یا نہ کرنے کی سفارش کرے گا۔ آئی ایم ایف کا وفد 25 ستمبر سے پاکستان کے دو ہفتے کا دورہ کرے گا، وفد وزارت خزانہ، توانائی، منصوبہ بندی، اسٹیٹ بینک، ایف بی آر، ریگولیٹری اداروں سمیت متعدد وزارتو ں کے علاوہ صوبائی حکومتوں سے بھی مذاکرات کرے گا۔

آئی ایم ایف وفد پاکستانی معیشت کے جائزے کے بعد ایک ارب ڈالر کی تیسری قسط جاری کرنے یا نہ کرنے کی سفارش کرے گا۔ وزارت خزانہ ذرائع نے بتایا کہ پاکستان نے قرض پروگرام کی تیسری قسط کے حصول کے لیے بیشتر اہداف حاصل کر لیے ہیں خاص طور پہ بجٹ خسارہ اور کرنٹ اکاؤنٹ خسارہ آئی ایم ایف کے اہداف کے مطابق ہے۔

(جاری ہے)

نان ٹیکس آمدن کے اہداف بھی آئی ایم ایف کے اہداف کے مطابق ہیں، مہنگائی بڑھنے کی شرح 5.1 فیصد کے مقررہ ہدف سے کم ہے تاہم ایف بی آر کو ٹیکس وصولیوں کے ہدف میں کمی کا سامنا ہے جس کی وجہ سیلاب ہے،بڑی فصلیں سیلاب کی نذر ہونے سے معاشی ترقی کے اہداف متاثر ہوسکتے ہیں جس کے لیے پاکستان آئی ایم ایف سے رعایت کی درخواست کرے گا۔

وزارت خزانہ کے ذرائع کے مطابق ایک اہم شرط پالیسی بورڈ کو ایف بی آر سے علیحدہ کرنا تھا جو پوری ہو چکی ہے۔پالیسی بورڈ کو وزارت خزانہ کے ماتحت کر دیا گیا ہے، مختلف ممالک سے قرض بھی رول اوور ہو گیا ہے۔