Live Updates

خیبرپختونخواہ سے چار ناراض پی ٹی آئی امیدوار سینیٹ الیکشن سے دستبردار

پاکستان تحریک انصاف کے پانچویں ناراض امیدوار خرم ذیشان اب بھی انتخابی دوڑ میں شامل ہیں

ساجد علی پیر 21 جولائی 2025 11:13

پشاور ( اُردو پوائنٹ اخبارتازہ ترین۔ 21 جولائی 2025ء ) صوبہ خیبرپختونخواہ سے چار ناراض پی ٹی آئی امیدوار سینیٹ الیکشن سے دستبردار ہوگئے۔ تفصیلات کے مطابق خیبرپختونخواہ میں سینیٹ انتخابات میں حصہ لینے والے تحریک انصاف کے 4 ناراض امیدوار اچانک انتخابی دوڑ سے دستبردار ہوگئے، جن میں عائشہ بانو، وقاص اورکزئی، ارشاد حسین اور عرفان سلیم شامل ہیں جب کہ پانچویں ناراض امیدوار خرم ذیشان اب بھی انتخابی دوڑ میں شامل ہیں۔

بتایا جارہا ہے کہ اس پیشرفت کے بعد تمام امیدواروں کے بلا مقابلہ منتخب ہونے کا امکان بڑھ چکا ہے، عائشہ بانو نے الیکشن سے دستبردار ہونے کے اپنے فیصلے کو مشکل مگر اصولی قدم قرار دیا اور کہا کہ ہماری پارٹی اگر آج بھی زندہ ہے تو یہ صرف ورکرز کی قربانیوں اور جدوجہد کی بدولت ہے، پارٹی قیادت سے گزارش ہے ہمیں بار بار آزمائش میں نہ ڈالا جائے ہم کمزور پارٹی نہیں کہ گٹھ جوڑ یا مفاہمت کی طرف جائیں، خرم ذیشان، عرفان سلیم، وقاص اورکزئی اور ارشاد حسین کو کسی سیٹ کا لالچ نہیں تھا بلکہ وہ ایک اصولی مؤقف پر کھڑے ہوئے تھے۔

(جاری ہے)

قبل ازیں وزیراعلیٰ خیبرپختونخواہ علی مین گنڈاپور کا کہنا تھا کہ سینیٹ الیکشن کے ناراض امیدواروں کیخلاف پارٹی کارروائی کرے گی، اپوزیشن اور حکومت کے درمیان دھوکا دہی نہیں ہوگی، ہارس ٹریڈنگ کو ڈونکی ٹریڈنگ کہتا ہوں، گھوڑا ایک بڑا قابل عزت جانور ہے میں خود گھوڑوں کا بہت شوقین ہوں، دیکھا جائے تو گدھا بھی خدمت کرنے والا جانور ہے، سینیٹ میں خرید و فروخت اس سے بھی گھٹیا کام ہے، فیصلہ کیا ہے کہ سینٹ میں خرید و فروخت نہیں ہونی چاہیئے۔

انہوں نے کہا کہ صوبے کی تاریخ میں پہلی بار اتنا اچھا فیصلہ ہورہا ہے، اس سے پہلے پنجاب سینیٹ انتخابات میں ہم نے یہی کیا ہے، بانی پی ٹی آئی نے جو فیصلہ کیا تھا اسی فارمولے پرعمل کریں گے، عدالتی احکامات کے تحت اب مخصوص نشستوں کے منتخب اراکین گورنر ہاؤس میں حلف لے رہے ہیں، ناراض امیدواروں کے خلاف پارٹی کارروائی کرے گی، عمران خان کے فیصلے کی نفی بانی پی ٹی آئی کی نفی ہے۔