لاہور ہائیکورٹ ،قتل کے مقدمے میں گرفتار ملزم کی ضمانت کی درخواست مسترد

پیر 21 جولائی 2025 15:28

لاہور (اُردو پوائنٹ اخبارتازہ ترین - این این آئی۔ 21 جولائی2025ء) لاہور ہائیکورٹ نے قتل کے مقدمے میں گرفتار ملزم بہار الدین کی بعد از گرفتاری ضمانت کی درخواست مسترد کر دی۔لاہور ہائیکورٹ کے جسٹس امجد رفیق نے کیس کی سماعت کی، ملزم کی جانب سے وکیل شاہد عظیم ایڈووکیٹ نے موقف اختیار کیا کہ پولیس نے حقائق کے برعکس بہارالدین کو مقدمے میں نامزد کیا ہے۔

(جاری ہے)

درخواست میں کہا گیا کہ قتل کے دو مدعیوں نے مختلف افراد کو نامزد کیا، جبکہ مقتول راشد کی والدہ نے ابتدائی طور پر مدعی مقدمہ شاہد مغل کو قاتل قرار دیا تھا، لیکن بعد میں دبا کے باعث بیان تبدیل کیا۔دائر درخواست میں مزید کہا گیا کہ واقعے کی کوئی سی سی ٹی وی فوٹیج موجود نہیں اور پولیس پہلے ہی شریک ملزمان عدنان اور عبد الستار کو بے گناہ قرار دے چکی ہے۔تاہم سرکاری وکیل نے موقف اپنایا کہ پولیس تفتیش میں بہارالدین کو قصوروار پایا گیا ہے، اس لئے اس کی ضمانت مسترد کی جائے۔عدالت نے دلائل سننے کے بعد ملزم بہارالدین کی درخواست ضمانت مسترد کر دی۔واضح رہے کہ ملزم کے خلاف 10اپریل 2023کو تھانہ صدر گوجرانوالہ میں مقدمہ درج کیا گیا تھا۔