معروف یوٹیوبررجب بٹ کے گھر پر فائرنگ کا معمہ حل ، شوٹرز گرفتار

شہزاد بھٹی کے کہنے پر شانی ٹائیگر نے شوٹرز بھیجے، ملزمان سی سی ڈی کے حوالے

منگل 22 جولائی 2025 16:22

معروف یوٹیوبررجب بٹ کے گھر پر فائرنگ کا معمہ حل ، شوٹرز گرفتار
لاہور (اُردو پوائنٹ اخبارتازہ ترین - این این آئی۔ 22 جولائی2025ء) معروف یوٹیوبر رجب بٹ کے گھر پر ہونے والی فائرنگ کا معمہ لاہور کی چوہنگ پولیس نے حل کر لیا۔ پولیس کے مطابق فائرنگ میں ملوث شوٹرز کاشف چوہان اور فرخ کو گرفتار کر لیا گیا ہے، جنہوں نے ابتدائی تفتیش میں اعتراف کیا کہ انہوں نے یہ حملہ شانی ٹائیگر نامی شخص کے کہنے پر کیا۔پولیس حکام کے مطابق فائرنگ کے وقت شوٹرز کے ساتھ کار میں دو مزید افراد، عثمان اور لقمان بھی موجود تھے۔

تفتیش سے معلوم ہوا کہ رجب بٹ کی سوشل میڈیا پر شہزاد بھٹی نامی نوجوان کے ساتھ تلخ کلامی ہوئی تھی، جس کے بعد شہزاد بھٹی نے شانی ٹائیگر سے رابطہ کیا، جس نے مبینہ طور پر شوٹرز کو رجب بٹ کے گھر بھیجا۔چوہنگ پولیس نے مختلف علاقوں بشمول ویلنشیا میں چھاپے مار کر ملزمان کو گرفتار کیا۔

(جاری ہے)

پولیس کا کہنا ہے کہ گرفتار ملزمان کو مزید تفتیش کے لیے سی سی ڈی کے حوالے کر دیا گیا ہے۔

پولیس ذرائع کے مطابق معاملے کی مکمل تحقیقات جاری ہیں اور اس بات کا جائزہ لیا جا رہا ہے کہ واقعے میں مزید کون سے عناصر ملوث ہو سکتے ہیں۔ فائرنگ کے واقعے نے سوشل میڈیا صارفین میں شدید تشویش پیدا کر دی تھی، تاہم پولیس کی بروقت کارروائی سے بڑی پیش رفت سامنے آئی ہے۔واضح رہے کہ یوٹیوبر رجب بٹ کے گھر پر متعدد بار نامعلوم افراد کی جانب سے فائرنگ کے واقعات سامنے آ چکے ہیں۔