ریمپ واک کے دوران شازیہ منظور نے جان بوجھ کر دھکے دیکر سٹیج پر گرایا، علیزے شاہ کا الزام

معروف اداکارہ کے ماضی کے فیشن شو کے دوران ریمپ پر پیش آنے والے واقعے سے متعلق سنگین الزامات سامنے آگئے

ساجد علی منگل 22 جولائی 2025 13:30

ریمپ واک کے دوران شازیہ منظور نے جان بوجھ کر دھکے دیکر سٹیج پر گرایا، ..

کراچی ( اُردو پوائنٹ اخبارتازہ ترین۔ 22 جولائی 2025ء ) معروف اداکارہ علیزے شاہ نے سینئر گلوکارہ شازیہ منظور پر انہیں ریمپ واک کے دوران جان بوجھ کر دھکے دیکر سٹیج پر گرانے کا الزام عائد کردیا۔ تفصیلات کے مطابق ملک کی شوبز انڈسٹری کی معروف اداکارہ علیزے شاہ کی جانب سے ماضی کے فیشن شو کے دوران ریمپ پر پیش آنے والے واقعے سے متعلق سنگین الزامات سامنے آئے ہیں، اس حوالے سے علیزے شاہ نے ایک ویڈیو بیان جاری کیا جس میں خود کے ساتھ انڈسٹری میں ہونے والی مبینہ بدسلوکی کا انکشاف کیا۔

علیزے شاہ نے بتایا کہ برائیڈل فیشن شو کے دوران ان کا گرنا اتفاقیہ نہیں تھا بلکہ گلوکارہ شازیہ منظور نے دانستہ طور پر اُنہیں بار بار پکڑا اور دھکا دیا، جس سے وہ اپنا توازن کھو بیٹھیں، یہ حرکت شازیہ منظور کی عادت ہے اور وہ اس سے قبل سوشل میڈیا سٹار جنت مرزا کے ساتھ بھی ایسا ہی سلوک کر چکی ہیں۔

(جاری ہے)

View this post on Instagram

اداکارہ کا مزید یہ بھی کہنا ہے کہ میزبان و اداکارہ جگن کاظم نے ناصرف واقعے کو سنجیدگی سے نہیں لیا بلکہ میرے گرنے پر مذاق بھی اُڑایا جو غیر پیشہ ورانہ رویہ ہے، ایسے رویے کسی کے لیے بھی شرمندگی کا باعث بن سکتے ہیں، خاص طور پر جب وہ عوامی مقام پر ہوں، میں انڈسٹری میں موجود منفی رویوں کے خلاف خاموش نہیں رہوں گی اور خود پر ہونے والے ہر ناپسندیدہ سلوک کو بے نقاب کرتی رہوں گی۔