صوبائی وزیرذیشان رفیق نے محکمہ بلدیات پنجاب میں ای سسٹم کا با ضابطہ افتتاح کردیا

منگل 22 جولائی 2025 17:20

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) محکمہ بلدیات پنجاب میں ای سسٹم کا نفاذ کر دیا گیا۔وزیر بلدیات ذیشان رفیق نے میونسپل کارپوریشن لاہور میں ایک تقریب کے دوران ای آکشن، ای بلنگ اور فنانشل مینجمنٹ سسٹم کا کمپیوٹر سکرین پر باضابطہ افتتاح کیا۔ اس موقع پر سیکرٹری لوکل گورنمنٹ شکیل احمد میاں اور ڈپٹی کمشنر لاہور سید موسی رضا بھی موجود تھے۔

وزیر بلدیات ذیشان رفیق نے سیکرٹری لوکل گورنمنٹ اور متعلقہ ٹیم کے کام کو سراہتے ہوئے کہا کہ نظام حکومت میں شفافیت وزیراعلی مریم نواز شریف کا فوکس ہے۔ای سسٹم شہریوں کیلئے سہولت اور خدمات کی فراہمی میں شفافیت کا باعث بنے گا۔ذیشان رفیق نے کہا کہ یہ بات خوش آئند ہے کہ اس سسٹم کی تیاری میں پنجاب بینک اور پی آئی ٹی بی نے معاونت کی۔

(جاری ہے)

ای بلنگ سسٹم کے ذریعے اب گھر بیٹھے میونسپل فیس کی وصولی ممکن ہوسکے گی۔

انہوں نے کہا کہ محکمہ بلدیات کے ریٹائرڈ ملازمین کی پنشن بھی اسی سسٹم سے منسلک کر دی گئی ہے جس سے پنشنروں کی شکایات کا ازالہ ہوسکے گا۔صوبائی وزیر نے ای سسٹم کے بارے میں موثر عوامی آگاہی مہم چلانے کی ہدایت کرتے ہوئے کہا کہ ستھرا پنجاب کے تحت ادائیگی کو بھی ڈیجیٹل سسٹم سے منسلک کیا جائے۔ تقریب کے دوران صوبائی وزیر اور سیکرٹری لوکل گورنمنٹ نے ڈیجیٹائزیشن کے عمل میں شریک افراد میں سوونئیر اور تعریفی اسناد تقسیم کیں۔

سیکرٹری بلدیات شکیل احمد میاں نے ستھرا پنجاب سروے کو ای سسٹم سے منسلک کرنے کی ہدایت کرتے ہوئے کہا کہ وقت گزرنے کے ساتھ ممکنہ تکنیکی پیچیدگی کو دور کیا جائے گا۔شہریوں کو اب میونسپل اداروں کے چکر نہیں لگانا پڑیں گے۔یہ سسٹم وزیراعلی کے ویژن پر عملدرآمد کا واضح ثبوت ہے۔