گراں فروشی کے خلاف مہم، گیارہ لاکھ رروپے سے زائدجرمانہ عائد

کراچی(اُردو پوائنٹ اخبارتازہ ترین - این این آئی۔ 22 جولائی2025ء)کمشنر کراچی سیدحسن نقوی کی زیرصدارت ان کے دفتر میں اجلاس منعقدکیاگیا۔اجلاس میں ایڈیشنل کمشنرزکراچی تمام ڈپٹی کمشنرز،اسسٹنٹ کمشنرز،بیورو آف سپلائی اور محکمہ فوڈ کے افسران نے شرکت کی۔ڈپٹی کمشنرز نے گراں فروشوں کے خلاف جاری مہم میں اپنے اپنے ضلع کی کارکردگی سے اجلا س کو آگاہ کیا۔

اسسٹنٹ کمشنر ہیڈ کوارٹرز رابعہ سید نے تمام اضلاع اور سب ڈویژن کی کارکردگی کے بارے میں بریفنگ دی۔ اجلاس کو بتایا گیا کہ گزشتہ 13 جولائی تا 19 جولائی کے دوران 131گراں فروشوں کے خلاف کارروائی کی گئی جس میں گیارہ لاکھ رروپے سے زائد جرمانہ عائد کیا گیا۔تفصیلات کے مطابق ضلع جنوبی میں 12 گراں فروشوں کے خلاف ایک لاکھ 99 ہزار روپے جرمانہ عاuد کیا گیا، ضلع شرقی میں 14 گراں فروشوں پر تین لاکھ 37 ہزار روپے جرمانہ عائدکیاگیا۔

(جاری ہے)

ضلع وسطی میں 17 گراں فروشوں پر ایک لاکھ 71 ہزار روپے جرمانہ عائدکیا گیا،ضلع غربی میں 13 گراں فروشوں پر 57 ہزار ضلع ملیر میں 30 گراں فروشوں کے خلاف کارروائی کی گئی کارروائی جس میں ایک لاکھ 17 ہزار ضلع کورنگی میں 31 گراں فروشوں کے خلاف کارروائی میں دو لاکھ روپے جرمانہ عائدکیا گیاجبکہ ضلع کیماڑی میں 30 گراں فروشوں پر 66 ہزار روپے جرمانہ عائد کیا گیا۔

رپورٹ کے مطابق اسسٹنٹ کمشنرز نے 1514 مقامات پر قیتیں چیک کیں۔اجلاس میں سبزیوں اور فروٹس کی قیمتوں کے تعین کا جائزہ لیا گیا۔ آلو اور پیاز کے آکشن کے نظام کا بھی جائزہ لیا گیا اجلاس نے آلو اور پیاز کے آکشن کے نظام پر عدم اطمینان کا اظہار کیا۔ کمشنر نے کہا کہ شہریوں کوریلیف فراہم کرنے کے لئے سبزی اور فروٹس کی قیمتوں کے تعین کا نظام بہتر بنانے کی ضروت ہے۔

انھوں نے مارکیٹ کمیٹی کو ہدایت کی کہ وہ مناسب قیمتوں کے تعین کے لئے اپنا کردار ادا کرے۔انھوں نے ڈپٹی کمشنرشرقی ابرار جعفر کو ہدایت کی کہ وہ مارکیٹ کمیٹی کے تعا ون سے سبزی منڈی میں آکشن نظام کو درست کرنے کے لئے مربوط کوششیں کریں۔ فیصلہ کیا گیا کہ ڈپٹی کمشنر شرقی فوری مارکیٹ کمیٹی کا اجلاس منعقد کریں گے۔ دیگر ڈپٹی کمشنرز کو بھی اپنا کردار ادا کرنے کی ہدایت کی گئی۔

فیصلہ کیا گیا کہ سبزی منڈی میں سبزی اور فروٹس کی قیمتیں مقرر کرنے کی کمیٹی میں فرائض انجام دینے والے اسسٹنٹ کمشنرز سے آکشن نظام کی بہتری اور قیمتیں مقرر کرنے کا شفاف نظام کرنے کے لئے اپنی تجزیاتی رپورٹ پیش کریں گے۔ اسسٹنٹ ڈپٹی ڈائریکٹر سندھ فوڈ اتھارٹی بشیر خان نے اجلاس کو اشیائے خوردونوش میں ملاوٹ کے خلا ف مہم کی تفصیلات سے آگاہ کیا۔

انھوں نے اجلاس کو بتایا کہ دودھ اور چائے کی پتی میں ملاوٹ کی کی شکایت پر دودھ اور چاے کی پتی کے نمونے جمع کئے جا رہے ہیں ہے اب تک ایک سو سے زائد نمونے جمع کئے جا چکے ہیں نمونے لیبارٹری مین ایگزامن کئے جا رہے ہیں فیصلہ کیا گیا کہ فوڈ اتھارٹی ملاوٹ کے خلاف مہم کی رپورٹ اگلے اجلاس میں پیش کرے گی۔ اجلاس میں تمام ڈپٹی کمشنرز ایڈیشنل کمشنر ون کراچی غلام مہدی شاہ ایڈیشنل کمشنر ٹو اسداللہ کھوسو اسسٹنٹ کمشنرہیڈکوارٹرز رابعہ سید اسسٹنٹ کمشنر ہاظم بنگوار اسسٹنٹ کمشنر بیوروآف سپلائی علی حیدر ڈپٹی ڈائریکٹر سندھ فوڈ اتھارٹی بشیر خان اور دیگر نے شرکت کی