Live Updates

راولپنڈی برساتی نالے میں بہہ جانیوالے ریٹائرڈ کرنل اور بیٹی کا تاحال کچھ پتہ نہ چل سکا

ریسکیو اہلکاروں نے ڈی ایچ اے کے رہائشی باپ بیٹی کی تلاش کا دائرہ دریائے سواں میں گورکھپور تک بڑھا دیا

ساجد علی بدھ 23 جولائی 2025 10:50

راولپنڈی برساتی نالے میں بہہ جانیوالے ریٹائرڈ کرنل اور بیٹی کا تاحال ..

راولپنڈی ( اُردو پوائنٹ اخبارتازہ ترین۔ 23 جولائی 2025ء ) راولپنڈی کے پوش علاقہ ڈی ایچ اے فیز 5 سے برساتی نالے میں بہہ جانے والے ریٹائرڈ کرنل اور ان کی بیٹی کا تاحال کچھ پتہ نہ چل سکا۔ تفصیلات کے مطابق راولپنڈی اور اسلام آباد میں تیز بارش کے باعث نشیبی علاقے زیر آب آچکے ہیں، راولپنڈی کی نجی ہاؤسنگ سوسائٹی میں بھی پانی داخل ہوگیا اور ملحقہ دیہات بھی زیر آب آگئے، اسی دوران 64 سالہ ریٹائرڈ کرنل اسحاق قاضی اپنی 25 سالہ بیٹی کے ہمراہ گاڑی میں گھر سے نکلے اور جب انہوں نے برساتی نالے کے قریب سے گاڑی گزارنے کی کوشش کی تو سڑک پر پانی کا ریلہ گاڑی کو بہا کر لے گیا، بہاؤ تیز ہونے کی وجہ سے دونوں باپ بیٹی بھی گاڑی کے ساتھ ہی پانی میں بہہ گئے، نالے میں کار سمیت بہہ جانے والے افراد گاڑی سے مدد کے لیے لوگوں کو پکارتے رہے۔

(جاری ہے)

ریسکیو حکام نے بتایا کہ پانی میں بہہ جانے والے افراد کی تلاش جاری ہے، پولیس اور ریسکیو 1122 کے غوطہ خور سرچ آپریشن میں حصہ لے رہے ہیں، جس کے نتیجے میں ڈی ایچ اے فیز 5 راولپنڈی کے برساتی نالے میں بہنے والی کار کا بمپر مل چکا ہے، تاہم گاڑی میں سوار باپ بیٹی تاحال لاپتہ ہیں اور کار سمیت بہہ جانے والے ریٹائرڈ کرنل اور اُن کی بیٹی کی تلاش کیلئے دریائے سواں میں بھی ریسکیو آپریشن شروع کردیا گیا۔

بتایا جارہا ہے کہ دریائے سواں میں گرنے والے نالے کی جگہ کھدائی کا عمل رات تین بجے تک جاری رہا، بارش کے باعث پانی کا بہائو بڑھ جانے کی وجہ سے ریٹائرڈ کرنل اور بیٹی کا سرچ آپریشن رات 3 بجے روکنا پڑا جو آج صبح دوبارہ شروع کردیا گیا، ریسیکو کی گاڑیاں اور عملہ دریائے سواں اور نجی سوسائٹی کے نالے پر موجود ہیں اور ریسکیو اہلکاروں نے ڈی ایچ اے کے رہائشی باپ بیٹی کی تلاش کا دائرہ دریائے سواں میں گورکھپور تک بڑھا دیا۔ بتایا جارہا ہے کہ شدید بارش سے متاثر ہونے والے گاؤں میں باغ راجگان، کھڑکن، سوہاوہ شامل ہیں جب کہ اڈیالہ سرکل اور بسکٹ فیکٹری چوک پر بارش کے پانی کے باعث ٹریفک کی روانی متاثر ہوگئی۔