فوڈ اتھارٹی آزاد جموں و کشمیر کی کارروائی، ناقص اور مضرصحت خوردونوش ضبط کر کے دکانداروں کو 21ہزار سے زائد کا جرمانہ

بدھ 23 جولائی 2025 23:44

مظفر آباد (اُردو پوائنٹ اخبارتازہ ترین - اے پی پی۔ 23 جولائی2025ء) فوڈ اتھارٹی آزاد جموں و کشمیر نے ناقص اور مضرصحت خوردونوش ضبط کر کے دکانداروں کو 21ہزار سے زائد کا جرمانہ عائد کیا۔ڈسٹرکٹ فوڈ کنٹرولر سید شجاعت حسین نقوی کی زیر نگرانی ہیڈکوارٹر آٹھ مقام بازار کےمعائنہ کے دوران انہوں نے صحت دشمن عناصر کے گرد گھیراتنگ کرتے ہوئے غیر معیاری اشیاء خوردونوش کیخلاف سخت آپریشن کیا،مضرصحت اشیاء خوردونوش ضبط کرتے ہوئے تلف کردیں،دکانداروں کو جرمانے اور بعض کووارننگ دی گئی۔

فوڈ اتھارٹی ٹیم نے ناقص کوکنگ آئل سنیک آئٹمز جو کہ نان رجسٹرڈ کمپنیزکے نمونے تجز یہ کے لیے لیبارٹری کوارسال کردئے۔ 3,500 رو پے مالیت کی خوراکی اشیاء، جن میں بسکٹ، جوس اور ٹافیاں شامل تھیں،غیر معیار اور غیر محفوظ ہونے کی بنیاد پر موقع پر ہی تلف کی گئیں۔

(جاری ہے)

اس کے علاوہ 5 کلو گرام ناقص کوکنگ آئل بھی معیار پر پورا نہ اترنے کی وجہ سے تلف کیا گیا۔

نان رجسٹرڈ کمپنیز کی پراڈکٹ کے نمونے حاصل کر کے لیبارٹری تجزیہ کے لیے بھیجے گئے۔ کئی دکانداروں کو اصلاحی نوٹسز جاری کیے گئے تاکہ وہ فوڈ سیفٹی قوانین کے مطابق اپنی سرگرمیوں میں بہتری لا سکیں۔ تمام دکانداروں کو سختی سے ہدایت کی گئی ہے کہ وہ اپنی مصنوعات کی فوڈ اتھارٹی سے رجسٹریشن کروائیں۔ فوڈ اتھارٹی کسی بھی غیر رجسٹرڈ خوراک کی فروخت یا تقسیم کی ہرگز اجازت نہیں دیتی۔ فوڈ اتھارٹی ٹیم میں فوڈ انالسٹ نازش اشرف، اسسٹنٹ فوڈ سیفٹی آفیسر خواجہ ممتاز، حافظ انور، سید امتیاز حسین شاہ شامل تھے۔ شہریوں نے فوڈ اتھارٹی کی ٹیم کی کارروائی کوسراہاہے۔