عالمی جونیئر اسکواش چیمپئن شپ میں پاکستان کا سفر تمام

ْپاکستان کے عبداللہ نواز کو مصری کھلاڑی آدم حویل نے پری کوارٹر فائنل میں 0-3 سے مات دے دی

بدھ 23 جولائی 2025 20:55

اسلام آباد (اُردو پوائنٹ اخبارتازہ ترین - این این آئی۔ 23 جولائی2025ء)عالمی جونیئر اسکواش چیمپئن شپ کے انفرادی ایونٹ میں پاکستان کا سفر ختم ہوگیا۔ پاکستان کے واحد کھلاڑی عبداللہ نواز کو مصری کھلاڑی آدم حویل نے پری کوارٹر فائنل میں 0-3 سے مات دے دی۔موصولہ اطلاعات کے مطابق مصر کے شہرنیوقاہرہ میں جاری عالمی جونیئر اسکواش چیمپین شپ کے انفرادی ایونٹ کے چوتھے راؤنڈ میں واحد پاکستانی کھلاڑی عبداللہ نواز مسلسل تیسری کامیابی کے بعد پری کوارٹر فائنل میں ہمت ہار گئے۔

(جاری ہے)

آدم حویل نے عبداللہ نواز کے خلاف پہلا گیم 6-11 سے جیتا اور دوسرے گیم میں 5-11 سے فتح حاصل کرنے کے بعد تیسرے گیم میں باآسانی 2-11 سے کامیابی حاصل کر کے کوارٹر فائنل میں جگہ بنا لی۔واضح رہے عبداللہ نواز نے تیسرے راؤنڈ میں امریکا کے آسکر، دوسرے راؤنڈ میں کینیڈا کے روہن پلوال اور پہلے راونڈ میں ہانگ کانگ کے کینگ ان لیونگ کو شکست دی تھی۔ پاکستان کے 4 میں سے 3 کھلاڑی محمدعمیرعارف، یحییٰ خان اور انس علی شاہ پہلے ہی راؤنڈ میں ہار گئے تھے۔عالمی جونیئر سکواش چیمپئن شپ کا ٹیم ایونٹ27 جولائی سے شروع ہوگا۔ پاکستان جونیئر ٹیم میں عبداللہ نواز، انس علی شاہ بخاری، محمد عمیر آصف اورعبیداللہ شامل ہیں۔