وائس چانسلر پنجاب یونیورسٹی پروفیسر ڈاکٹر محمد علی کی ہدایت پردوبوائز ہاسٹلز کو گرلز ہاسٹلز میں تبدیل کر دیا گیا

جمعرات 24 جولائی 2025 23:06

لاہور (اُردو پوائنٹ اخبارتازہ ترین - اے پی پی۔ 24 جولائی2025ء) وائس چانسلرپروفیسرڈاکٹر محمد علی کی ہدایت پرپنجاب یونیورسٹی میں طالبات کی تعداد کے پیش نظر 2 بوائزہاسٹلز کو گرلزہاسٹلز میں تبدیل کر دیا گیا۔ترجمان پنجاب یونیورسٹی کے مطابق وائس چانسلر کے اس اقدام سے یونیورسٹی میں بوائز اور گرلز ہاسٹلز کی تعداد برابر ہو گئی ہے، اس وقت پنجاب یونیورسٹی میں 56 فیصد طالبات اور 44 فیصد طلبا زیر تعلیم ہیں۔

انہوں نے کہا کہ 56 فیصد طالبات کیلئے 12 اور 44 فیصد طلبا کیلئے 16 ہاسٹلز مختص تھے جبکہ طالبات کی تعداد میں اضافے کے باعث گرلز ہاسٹلز میں طالبات کو شدید پریشانی کا سامنا تھا۔انہوں نے کہا کہ طالبات کو مساوی بنیادوں پر ہاسٹلز کی سہولیات فراہم کرنے کے لئے انتظامیہ نے 2 بوائز ہاسٹلز کوگرلز ہاسٹلز میں بدل دیا۔

(جاری ہے)

انہوں نے کہا کہ بوائز ہاسٹل نمبر 17 کو حضرت بی بی آسیہ( ر)جبکہ خالد بن ولید ہال کو حضرت بی بی صفیہ (ر)کے نام سے منسوب کر دیا گیاہے۔

انہوں نے کہا کہ تبدیل کئے گئے بوائز ہاسٹلز کے تمام طلبا کو دیگر ہاسٹلز میں رہائشی سہولیات فراہم کی جائیں گی جبکہ حالیہ ہاسٹل کلین اپ آپریشن کے باعث بوائز ہاسٹلز میں سینکڑوں قانونی طلبا کیلئے گنجائش پیدا ہوئی تھی۔ انہوں نے کہا کہ یونیورسٹی کا یہ اقدام خواتین کو برابری کے حقوق و سہولیات فراہم کرنے کی پالیسی کا ثبوت ہے۔