امریکا کے معروف پروفیشنل ریسلر ہلک ہوگن کی موت پر ٹرمپ کااظہارافسوس

جمعہ 25 جولائی 2025 12:51

واشنگٹن (اُردو پوائنٹ اخبارتازہ ترین - این این آئی۔ 25 جولائی2025ء)امریکا کے معروف پروفیشنل ریسلر ہلک ہوگن کے انتقال پر امریکا کے صدر ڈونلڈ ٹرمپ نے دکھ کا اظہار کیا ہے۔گزشتہ روز 71 برس کی عمر میں ہلک ہوگن امریکا کے شہر فلوریڈا میں دل کا دورہ پڑنے کے باعث انتقال کر گئے تھے۔اس حوالے سے سوشل میڈیا پر امریکا کے صدر ڈونلڈ ٹرمپ نے اپنے جذبات اور تاثرات کا اظہار کیا ہے۔

(جاری ہے)

ڈونلڈ ٹرمپ نے سوشل میڈیا پر پیغام میں لکھا کہ آج ہم نے ایک اچھے دوست کو کھودیا، ہلک ہوگن صحیح معنوں میں میگا کے حامی تھے۔امریکی صدر نے لکھا کہ ہلک ہوگن نے ریپبلکن نیشنل کنونشن میں بھی شاندار تقریر کی تھی، انہوں نے دنیا بھر کے مداحوں کو محظوظ کیا اور ان کا ثقافتی اثر بے حد وسیع تھا۔امریکی صدر نے مزید کہا کہ ہلک ہوگن کی اہلیہ اسکائی اور اہلِ خانہ سے تعزیت کرتا ہوں، ہلک ہوگن کو ہمیشہ یاد رکھا جائے گا۔