محکمہ پبلک ہیلتھ انجینئرنگ و دیہی ترقی سندھ کے تحت 275 کامیاب امیدواروں میں آفر لیٹرز تقسیم کرنے کی تقریب کا انعقاد

جمعہ 25 جولائی 2025 15:59

کراچی (اُردو پوائنٹ اخبارتازہ ترین - این این آئی۔ 25 جولائی2025ء)محکمہ پبلک ہیلتھ انجینئرنگ و دیہی ترقی سندھ کے تحت 275 کامیاب امیدواروں میں آفر لیٹرز تقسیم کرنے کی تقریب کا انعقاد کیا گیا ۔تقریب سے خطاب کرتے ہوئے معاون خصوصی وزیر اعلی سندھ برائے پبلک ہیلتھ انجینئرنگ و دیہی ترقی محمد سلیم بلوچ نے کہا کہ سب انجینئرز کی پوسٹس کے لیے آفر لیٹر وصول کرنے والے تمام افراد کو خوش آمدید کہتے ہیں ۔

مجھے بہت خوشی ہے کہ آج 275 نئے آئی بی اے ٹیسٹ پاس امیدواران کو آفر لیٹرز تقسیم کررہے ہیں۔آج کا دن چیئرمین پیپلز پارٹی بلاول بھٹو زرداری کے وعدوں کی تکمیل کا حصہ ہے۔انہوںنے کہا کہ میرٹ اور شفافیت کے لیے ہم نے آئی بی اے سکھر کی خدمات حاصل کی تھیں۔ہماری خالی اسامیوں پر چھ ہزار افراد نے اپلائی کیا تھا۔

(جاری ہے)

1792 افراد نے امتحان پاس کیا تھا۔چیئرمین بلاول بھٹو، وزیر اعلی سندھ، فریال تالپور کی واضح ہدایت تھی کہ میرٹ کو مدنظر رکھا جائے۔

انٹرویو کمیٹی میں این ای ڈی یونیورسٹی، مہران یونیورسٹی کے اساتذہ، ایس این جی ڈی اور محکمہ کے افسران شامل تھے۔دو ماہ تک تمام کامیاب امیدواروں کا انٹرویو مشکل مرحلہ تھا۔انہوںنے شفاف انٹرویوز کے انعقاد پر کمیٹی کو مبارکبادی ۔سلیم بلوچ نے کہا کہ محکمہ پبلک ہیلتھ انجینئرنگ کا فیلڈ کا کام ہوتا ہے۔مجھے خوشی ہے مرد نوجوانوں کے ساتھ لڑکیوں نے بھی اس فیلڈ میں قدم رکھا۔امید ہے نئے بھرتی ہونے والے سب انجینئرز اپنی بھرپور خدمات سے محکمے کا نام روشن کریں گے