سندھ ، معروف ٹک ٹاکر سمیرا راجپوت کی لاش گھرسے پراسرارحالت میں برآمد

جمعہ 25 جولائی 2025 21:55

کراچی(اُردو پوائنٹ اخبارتازہ ترین - آن لائن۔ 25 جولائی2025ء)سندھ کے ضلع گھوٹکی کے ممتاز شاہ محلے میں معروف ٹک ٹاکر سمیرا راجپوت کی لاش ان کے گھر سے پراسرار حالت میں برآمد ہوئی۔ ابتدائی اطلاعات کے مطابق سمیرا کی موت زہریلی چیز کھانے سے واقع ہوئی، تاہم حتمی وجہ جاننے کے لیے لاش کو تعلقہ اسپتال گھوٹکی منتقل کر کے پوسٹ مارٹم کے لیے بھیج دیا گیا ہے۔

پولیس کے مطابق سمیرا راجپوت نے تین سال قبل علی رضا نامی شخص سے طلاق لے لی تھی۔ مقتولہ کے بھائی صدام کا دعویٰ ہے کہ ان کی بہن کو سابق شوہر علی رضا اور اس کے ساتھی عمران نے زہر دے کر قتل کیا۔ مقتولہ کی بیٹی نے بھی پولیس کو بتایا ہے کہ دونوں افراد سمیرا سے شادی کے خواہش مند تھے، جس پر کئی مرتبہ تنازعہ بھی ہوا۔واقعے کے بعد پولیس نے کارروائی کرتے ہوئے علی رضا اور عدنان نامی نوجوان کو شک کی بنیاد پر حراست میں لے لیا ہے۔

(جاری ہے)

پولیس حکام کا کہنا ہے کہ مقدمے کی مزید کارروائی پوسٹ مارٹم رپورٹ کے بعد عمل میں لائی جائے گی۔ادھر سمیرا راجپوت کی ایک پرانی ویڈیو بھی منظر عام پر آئی ہے جس میں وہ واضح طور پر اپنی موت کا خدشہ ظاہر کرتے ہوئے اس کا ذمہ دار اپنے سابق شوہر علی رضا کو قرار دے رہی ہیں۔ اس ویڈیو نے کیس کو مزید حساس بنا دیا ہے۔پولیس نے مقتولہ کے گھر سے شواہد اکھٹے کر لیے ہیں اور تفتیش کا دائرہ مزید وسیع کر دیا گیا ہے۔