مون سون بارشوں اور گلیشئیر پگھلنے کے باعث دریائوں کے بہائو میں اضافہ، پنجاب کے بڑے دریائوں اور ملحقہ ندی نالوں میں طغیانی کا خدشہ

ہفتہ 26 جولائی 2025 11:37

لاہور (اُردو پوائنٹ اخبارتازہ ترین - اے پی پی۔ 26 جولائی2025ء) حالیہ مون سون بارشوں اور گلیشئیر پگھلنے کے باعث دریائوں کے بہائو میں اضافہ ہوا ہے جس سے پنجاب کے بڑے دریائوں اور ان سے ملحقہ ندی نالوں میں طغیانی کا خدشہ ہے۔ترجمان پی ڈی ایم اے کے مطابق دریائے سندھ میں تربیلا ،کالاباغ اور چشمہ کے مقام پر نچلے درجے جبکہ تونسہ کے مقام پر درمیانے درجے کا سیلاب ہے۔

تربیلا کے مقام پر پانی کی آمد 3 لاکھ 9 ہزار جبکہ اخراج 2 لاکھ 66 ہزار کیوسک ، تونسہ کے مقام پر پانی کی آمد 4 لاکھ 47 ہزار کیوسک جبکہ اخراج 4 لاکھ 41 ہزار کیوسک ہے ،کاالاباغ کے مقام پر پانی کی آمد 3 لاکھ جبکہ اخراج 2 لاکھ 93 ہزار کیوسک اورچشمہ کے مقام پر پانی کی آمد 3 لاکھ 72 ہزار کیوسک جبکہ اخراج 3 لاکھ 57 ہزار کیوسک ریکارڈ ریکارڈ کی گئی ہے ۔

(جاری ہے)

ترجمان کے مطابق دریائے چناب، راوی، جہلم اور ستلج میں پانی کا بہائو فی الحال نارمل لیول پر ہے تا ہم بارشوں کے باعث پنجاب کے بڑے دریائوں اور ان سے ملحقہ ندی نالوں میں طغیانی کا خدشہ ہے ۔ ڈیرہ غازی خان رود کوہیوں میں پانی کا بہائو نارمل ہے جبکہ آئندہ 24 گھنٹوں میں پانی کی سطح میں اضافے کا خدشہ ہے۔ اس سلسلہ میں ریلیف کمشنر پنجاب نبیل جاوید کی جانب سے متعلقہ انتظامیہ کو الرٹ رہنے کی ہدایات جاری کر دی گئی ہیں ۔

پی ڈی ایم اے کنٹرول روم اور ڈسٹرکٹ ایمرجنسی آپریشن سنٹرز مسلسل صورتحال کو مانیٹر کر رہے ہیں۔ریلیف کمشنر پنجاب نے مزید کہا کہ ممکنہ بارشوں و سیلاب کے پیش نظر کمشنرز و ڈپٹی کمشنرز فیلڈ میں موجود رہیں۔ڈی جی پی ڈی ایم اے عرفان علی کاٹھیا نے عوام الناس سے اپیل کرتے ہوئے کہا ہے کہ موسم برسات میں احتیاطی تدابیر اختیار کریں ۔دریائوں نہروں اور ندی نالوں میں مت نہائیں ۔ ہنگامی صورتحال میں پی ڈی ایم اے کی ہیلپ لائن 1129 پر کال کریں۔