ٹائیگرزکی حفاظت کا عالمی دن ورلڈ ٹائیگرڈے 29جولائی کو منایا جائے گا

ہفتہ 26 جولائی 2025 13:33

مکوآنہ (اُردو پوائنٹ اخبارتازہ ترین - این این آئی۔ 26 جولائی2025ء) پاکستان سمیت دنیا بھر میں ٹائیگرز کی حفاظت کا عالمی دن ورلڈ ٹائیگر ڈے 29جولائی کومنایا جائے گا،اس دن کے منانے کا مقصد فیصل آباد سمیت دنیا بھر میں ٹائیگرز کی حفاظت اور انہیں قدرتی ماحول کی فراہمی کے متعلق شعور و آگہی فراہم کرنا ہے۔اس دن کے حوالے سے محکمہ جنگلی حیات،جانوروں کے حقوق کیلئے سرگرم تنظیموں اور چڑیا گھروں کی انتظامیہ کے زیر اہتمام مختلف تقریبات کا اہتمام کیا جائے گا،جس میں خوبصورتی اور جنگلی حیات کی بقا کیلئے ٹائیگرز کی اہمیت کو اجاگر کیا جائے گا۔

ٹائیگر کئی ممالک خصوصا ایشیائی ممالک کا قومی جانور ہے اس کا شمار دنیا کے خطرناک ترین جانوروں میں کیا جاتا ہے یہ قوت اور طاقت میں اپنی مثال آپ ہے ٹائیگر کی بہت سی اقسام ہیں جو کہ جنوبی بھارت ،بنگلادیش،نیپال،بھوٹان،برما،تھائی لینڈ،ملائشیا،انڈونیشیا،کمبوڈیا،ویت نام،چائنہ،روس اور مختلف ایشیائی ممالک میںپائے جاتے ہیں ان میں بنگالی اور سائبیرین ٹائیگر دنیا کے تیز رفتار جانوروں میں شامل ہیں۔

(جاری ہے)

ایک رپورٹ کے مطابق دنیا بھر میں ٹائیگرز کی تعداد میں خطرناک حد تک کمی ہو رہی ہے ایشیا بھر میں ٹائیگرزکی تعداد ایک لاکھ کے لگ بھگ تھی جو کہ کم ہو کر ساڑھے تین ہزار تک رہ گئی ہے مختلف ممالک میں ٹائیگرز کی افزائش نسل اور ان کی حفاظت کیلئے تنظیموں سرگرم عمل ہیں۔