برطانیہ، قتل کے الزام میں 2 نابالغ لڑکوں کو 15 سال قید کی سزا سنادی گئی

مجرموںکو 15 سال اور 110 دن کے بعد پے رول دینے پر غور کیا جاسکتا ہے،عدالت

ہفتہ 26 جولائی 2025 14:51

لندن(اُردو پوائنٹ اخبارتازہ ترین - این این آئی۔ 26 جولائی2025ء)برطانوی عدالت نے 2 نابالغ لڑکوں کو ایک 14 سالہ لڑکے کو قتل کرنے کے جرم میں 15 سال قید کی سزا سنا دی۔غیرملکی میڈیا کے مطابق جج مارک لوکرافٹ نے لندن کی اولڈ بیلی کورٹ میں کیس کا فیصلہ سنایا، جس میں یہ بھی کہا گیا کہ سزا پانے والوں کو 15 سال اور 110 دن کے بعد پے رول دینے پر غور کیا جاسکتا ہے۔

(جاری ہے)

مجرموں کی عمریں 15 سے 16 سال بتائی جاتی ہیں، بالغ نہ ہونے کی وجہ سے سزا یافتہ مجرمان کے نام نہیں بتائے گئے۔ ان مجرموں نے 14 سالہ کیلیان ہوکاسا کو 7 جنوری کو جنوب مشرقی لندن میں ایک بس میں چاقو کے 27 وار کر کے زخمی کر دیا تھا، بعد میں کیلیان ان زخموں کی تاب نہ لاتے ہوئے ہلاک ہوگیا تھا۔لندن پولیس کے مطابق گزشتہ سال 10 نابالغ چھوریوں کے وار سے ہلاک ہوئے تھے، جبکہ 2023 میں 18 نابالغوں چھوریوں کے وار کر کے قتل کیا گیا تھا۔