ٹک ٹاکر سمیراراجپوت قتل کیس، والدہ کو زبردستی گولیاں کھلائی گئیں، بیٹی کی مدعیت میں مقدمہ درج

مقدمے میں سابق شوہر علی رضا اور اس کے ساتھی عمران کو نامزد کیا گیا ہے، تفتیش جاری ہے مزید پیش رفت پوسٹ مارٹم رپورٹ کے بعد سامنے آئے گی، پولیس

فیصل علوی ہفتہ 26 جولائی 2025 15:04

ٹک ٹاکر سمیراراجپوت قتل کیس، والدہ کو زبردستی گولیاں کھلائی گئیں، ..

گھوٹکی(اردوپوائنٹ اخبار تازہ ترین۔26جولائی 2025)گھوٹکی میں ٹک ٹاکر سمیرا راجپوت قتل کیس میں مقتولہ کی بیٹی کی مدعیت میں مقدمہ درج کرلیا گیا، سمیرا کی بیٹی نے مؤقف اختیار کیا کہ ان کی والدہ کو زبردستی گولیاں کھلائی گئیں جس کے باعث حالت بگڑنے پر انہیں سکھر منتقل کیا گیا، مگر وہ جانبر نہ ہو سکیں،سندھ کے شہر گھوٹکی کے ممتاز شاہ محلے میں معروف ٹک ٹاکر سمیرا راجپوت کی پراسرار موت کا معاملہ سنگین رخ اختیار کر گیا۔

پولیس کے مطابق مقدمہ تھانہ اے سیکشن میں مقتولہ کی بیٹی کی مدعیت میں درج کیا گیا ہے۔مقدمے میں سابق شوہر علی رضا اور اس کے ساتھی عمران کو نامزد کیا گیا جبکہ پولیس نے کارروائی کرتے ہوئے دونوں ملزمان کو گرفتار کرلیا ہے۔ ترجمان پولیس کا کہنا ہے کہ ابتدائی تفتیش جاری ہے اور مزید پیش رفت پوسٹ مارٹم رپورٹ کے بعد سامنے آئے گی۔

(جاری ہے)

سمیرا کی بیٹی کے مطابق ان افراد نے کئی بار سنگین دھمکیاں بھی دی تھیں۔

اہلخانہ کے مطابق سمیرا راجپوت نے تین سال قبل علی رضا سے طلاق لے لی تھی مگر وہ اور اس کا ساتھی عمران دوبارہ شادی کا دباؤ ڈال رہے تھے جس پر کئی بار تنازعہ بھی ہواتھا۔پولیس کا کہنا ہے کہ واقعے کی ہر پہلو سے تحقیقات کی جا رہی ہیں اور جلد حقائق سامنے لائے جائیں گے۔واضح رہے کہ سندھ کے علاقے گھوٹکی میں ٹک ٹاکر سمیرا راجپوت پراسرار طور پر جاں بحق ہوگئیں تھیں۔

پولیس نے دو ملزمان علی راجپوت اور عدنان راجپوت کو گرفتار کرلیا تھا۔تفصیلات کے مطابق گھوٹکی کے ممتاز شاہ محلے میں معروف ٹک ٹاکر سمیرا راجپوت کی لاش ان کے گھر سے پراسرار حالت میں برآمد ہوئی تھی۔ ابتدائی اطلاعات کے مطابق سمیرا کی موت زہریلی چیز کھانے سے واقع ہوئی تاہم موت کی حتمی وجہ جاننے کیلئے لاش کو تعلقہ ہسپتال گھوٹکی منتقل کر کے پوسٹ مارٹم کیلئے بھیج دیا گیا تھا۔

پولیس نے مقتولہ کے گھر سے شواہد اکھٹے کر لئے ہیں اور تفتیش کا دائرہ مزید وسیع کر دیا گیا تھا۔ ٹک ٹاکر سمیرا راجپوت کے بھائی نے الزام لگایا ہے کہ سمیرا کو اس کے سابق شوہر علی رضااور اس کے ساتھی عمران نے مبینہ طور پر زہردے کر قتل کیا تھا۔ مقتولہ کی بیٹی نے بھی پولیس کو بتایا تھا کہ دونوں افراد سمیرا سے شادی کے خواہش مند تھے جس پر کئی مرتبہ تنازعہ بھی ہوا۔ پولیس کے مطابق سمیرا راجپوت نے تین سال قبل علی رضا نامی شخص سے طلاق لے لی تھی۔