ایف سی بلوچستان نارتھ کی قیام امن کیلئے بے مثال قربانیاں ہیں ، وفاقی وزیرداخلہ محسن نقوی

اتوار 27 جولائی 2025 11:30

اسلام آباد/کوئٹہ (اُردو پوائنٹ اخبارتازہ ترین - اے پی پی۔ 27 جولائی2025ء) وفاقی وزیرداخلہ محسن نقوی نے کہا ہے کہ ایف سی بلوچستان نارتھ کی قیام امن کیلئے بے مثال قربانیاں ہیں ،فتنہ الہندوستان کے مذموم عزائم ناکام بنانے میں اس فورس کے افسروں اور جوانوں نے شجاعت کی تاریخ رقم کی ہے ،فرنٹیئر کور بلوچستان نارتھ کے افسران اور جوانوں کی پیشہ وارانہ مہارت اور بہادری پر ناز ہے۔

وزارت داخلہ کے مطابق ان خیالات کا اظہار وفاقی وزیرداخلہ محسن نقوی نے ہیڈ کوارٹرز نارتھ فرنٹیئر کور بلوچستان کے دورہ کے موقع پر کیا۔ ہیڈ کوارٹر آمد پر وزیرداخلہ کو ایف سی بلوچستان نارتھ کے چاک و چوبند دستے نے سلامی پیش کی اور فرنٹیئر کور بلوچستان نارتھ کے آئی جی میجر جنرل عابد مظہر نے وفاقی وزیر داخلہ محسن نقوی کا افسران سے تعارف کرایا۔

(جاری ہے)

وفاقی وزیر نے یادگار شہداء پر ضری دی اور یادگار شہداء پر پھول رکھے اور فاتحہ خوانی بھی کی۔ انہوں نے ایف سی بلوچستان نارتھ کے شہداء کے درجات کی بلندی کے لئے دعا کی اور شہداء کی قربانیوں کو خراج عقیدت پیش کیا۔محسن نقوی کو آئی جی ایف سی بلوچستان نارتھ میجر جنرل عابد مظہر نے فورس کی تربیت اور پیشہ وارانہ صلاحیتوں کے بارے بریفنگ دی۔

اس موقع پر گفتگو کرتے ہوئے وزیرداخلہ محسن نقوی نے بلوچستان میں قیام امن کیلئے فرنٹیئر کور نارتھ کی گراں قدر خدمات کو سراہا اور کہا کہ فرنٹیئر کور بلوچستان نارتھ مایہ ناز فورس ہے ۔ محسن نقوی نے مزید کہا کہ ایف سی بلوچستان نارتھ کی قیام امن کیلئے قربانیاں انمٹ ہیں،فتنہ الہندوستان کے مذموم عزائم ناکام بنانے میں اس فورس کے افسروں اور جوانوں نے شجاعت کی تاریخ رقم کی ہے،فرنٹیئر کور بلوچستان نارتھ کے افسران اور جوانوں کی پیشہ وارانہ مہارت اور بہادری پر ناز ہے۔