بھارت میں ایک سالہ بچے نے زہریلے سانپ کو کاٹ کر مار ڈالا، بچہ معجزانہ طور پر زندہ بچ گیا

اتوار 27 جولائی 2025 13:10

نئی دہلی (اُردو پوائنٹ اخبارتازہ ترین - این این آئی۔ 27 جولائی2025ء)بھارت میں ایک سالہ بچے نے زہریلے سانپ کو کاٹ کر مار ڈالا، بچہ معجزانہ طور پر بچ گیا۔بھارتی ٹی وی کے مطابق بھارتی ریاست بہار کے ضلع ویسٹ چمپارن میں ایک حیران کن اور ناقابل یقین واقعہ پیش آیا ہے، جہاں ایک سالہ بچے نے کھیلتے ہوئے ایک زہریلے کوبرا سانپ کو کاٹ کر مار ڈالا، خوش قسمتی سے بچہ زندہ بچ گیا، اس کی حالت اب مستحکم بتائی جا رہی ہے۔

ننھا گووندا اپنے گھر کے صحن میں کھیل رہا تھا کہ تقریبا دو فٹ لمبا کوبرا سانپ گھر میں داخل ہو گیا، بچے نے سانپ کو کھلونا سمجھا اور اسے پکڑ کر اپنے منہ میں لے لیا، جس کے بعد اس نے سانپ کو اس زور سے کاٹا کہ سانپ موقع پر ہی دم توڑ گیا۔بچے کی نانی نے جب یہ منظر دیکھا تو وہ ہکا بکا رہ گئیں، لیکن اس وقت تک بچہ سانپ کو دو حصوں میں چیر چکا تھا، واقعے کے فورا بعد گووندا بے ہوش ہوگیا، جس پر اسے فورا قریبی پرائمری ہیلتھ سینٹر پہنچایا گیا، جہاں ابتدائی طبی امداد کے بعد اسے مزید علاج کے لیے گورنمنٹ میڈیکل کالج منتقل کیا گیا۔

(جاری ہے)

اسپتال ذرائع کے مطابق بچے کے جسم میں زہر کی کوئی علامات نظر نہیں آئی اور وہ اب مکمل طبی نگرانی میں ہے۔بچے کی نانی کے مطابق واقعے کے وقت بچے کی والدہ لکڑیاں چننے کے لیے گھر سے باہر گئی ہوئی تھیں۔