یوٹیوبر ابرار قریشی کو دو سیاسی شخصیات کو 2 لاکھ 60 ہزار پاؤنڈ سے زائد ہرجانہ ادا کرنے کا حکم

اتوار 27 جولائی 2025 14:30

لندن (اُردو پوائنٹ اخبارتازہ ترین - این این آئی۔ 27 جولائی2025ء)برطانیہ کی عدالت نے کشمیری نژاد یوٹیوبر ابرار قریشی کو ہتکِ عزت کے مقدمے میں دو سیاسی رہنماں کو 2 لاکھ 60 ہزار پانڈ سے زائد ہرجانہ ادا کرنے کا حکم دیا ہے۔ یہ فیصلہ ابرار قریشی کی جانب سے اپنے یوٹیوب پروگرام گورکھ دھندہ میں سنگین الزامات لگانے کے بعد سامنے آیا۔یہ مقدمہ پاکستان پیپلز پارٹی کے رہنما چوہدری محمد یاسین اور ان کے بیٹے چوہدری عمار یاسین نے لندن کی عدالت میں دائر کیا تھا۔

ان کا کہنا تھا کہ ویڈیوز میں لگائے گئے الزامات نے ان کی ساکھ کو شدید نقصان پہنچایا ہے۔عدالت نے قرار دیا کہ ابرار قریشی نے الزامات نشر کرنے سے پہلے ان کی تصدیق نہیں کی اور نہ ہی دعویداروں کا مقف لیا، جو صحافتی ذمہ داری کے خلاف ہے۔

(جاری ہے)

عدالت نے یوٹیوبر کو ہر دعوے دار کو 1 لاکھ 30 ہزار پانڈ ہرجانہ، 21 ہزار 829 پانڈ سود اور 65 ہزار پانڈ قانونی اخراجات ادا کرنے کا حکم دیا ہے۔

جج نے یہ بھی کہا کہ ان ویڈیوز سے دعویداروں کو پاکستان اور برطانیہ میں عوامی سطح پر بدنامی کا سامنا کرنا پڑا، اور ویڈیوز کے لہجے سے ناظرین کو یہ تاثر ملا کہ الزامات درست ہیں۔عدالت نے ابرار قریشی کو حکم دیا ہے کہ وہ ایسے الزامات دوبارہ شائع نہ کریں اور 7 دن کے اندر فیصلے کا خلاصہ اپنے تمام سوشل میڈیا پلیٹ فارمز پر شائع کریں۔چوہدری محمد یاسین نے عدالت کے فیصلے کو سچائی اور احتساب کی فتح قرار دیا ہے۔