وفاقی وزیرداخلہ محسن نقوی کی مظفر آباد میں شہید میجر رب نواز کی رہائش گاہ پر آمد، اہل خانہ سے ملاقات اور تعزیت کی

اتوار 27 جولائی 2025 15:10

اسلام آباد (اُردو پوائنٹ اخبارتازہ ترین - اے پی پی۔ 27 جولائی2025ء) وفاقی وزیرداخلہ محسن نقوی نے مظفر آباد میں شہید میجر رب نواز کی رہائش گاہ پر جاکر شہید میجر رب نواز کے والد،بھائی اور دیگر اہل خانہ سے ملاقات کی اور ان کی شہادت پر اہل خانہ سے اظہار تعزیت اور درجات کی بلندی کے لئے دعا کی۔یہاں جاری بیان کے مطابق وفاقی وزیرداخلہ محسن نقوی نے شہید میجر رب نواز کی بہادری اور شجاعت کو خراج عقیدت پیش کیا۔

(جاری ہے)

وزیرداخلہ محسن نقوی نے شہید میجر رب نواز کے والد اور بھائی کے حوصلے اور جذبے کو سراہا اور کہا کہ جس قوم کے پاس آپ جیسے بلند حوصلہ والد ہوں،اسے دشمن شکست نہیں دے سکتا۔محسن نقوی نے کہا کہ میجر رب نواز نے فتنہ الہندوستان کے دہشتگردوں کے خلاف بہادری سے لڑتے ہوئے قیمتی جان وطن پر نچھاور کی،میجر رب نواز قوم کے ہیرو ہیں اور ہمارے دلوں میں ہمیشہ زندہ رہیں گے،شہداء کے خاندان کے ساتھ کھڑے ہیں اور ہمیشہ کھڑے رہیں گے۔

محسن نقوی نے کہا کہ شہدا نے اپنے قیمتی لہو سے امن کی آبیاری کی ہے اورپوری قوم کو شہداء کی عظیم قربانیوں پر ناز ہے۔میجر رب نواز نے چند روز قبل بلوچستان کے علاقے آواران میں فتنہ الہندوستان کے دہشتگردوں کا بہادری سے مقابلہ کرتے ہوئے جام شہادت نوش کیا۔