ویسٹ انڈیزاورآسٹریلیا کی کرکٹ ٹیموں کے درمیان پانچواں اور آخری ٹی ٹونٹی میچ کل ہوگا

پیر 28 جولائی 2025 15:08

جمیکا(اُردو پوائنٹ اخبارتازہ ترین - این این آئی۔ 28 جولائی2025ء)ویسٹ انڈیز اور آسٹریلیا کی کرکٹ ٹیموں کے درمیان پانچ ٹی ٹونٹی میچوں پر مشتمل سیریز کا پانچواں اور آخری میچ کل (منگل کو) وارنر پارک، باسیٹر، سینٹ کٹس میں کھیلا جائے گا۔آسٹریلیا کی مردوں کی قومی کرکٹ ٹیم ویسٹ انڈیز کے دورہ پر ہے جہاں وہ میزبان ٹیم کے خلاف 3 ٹیسٹ اور 5 ٹی ٹونٹی بین الاقوامی میچوں کی سیریز کھیلے گی۔

تین ٹیسٹ میچوں کی سیریز کھیلی جا چکی ہے جس میں مہمان آسٹریلوی ٹیم نے میزبان ویسٹ انڈیز ٹیم کے خلاف 0-3 سے کلین سویپ کیا تھا۔ٹی ٹونٹی سیریز کے چار میچز کھیلے جا چکے ہیں جو مہمان آسٹریلوی ٹیم نے جیت لئے ہیں۔ آسٹریلوی ٹیم کو ٹی ٹونٹی سیریز میں مچل مارش لیڈ کر رہے ہیں جبکہ میزبان ویسٹ انڈین ٹیم کو وکٹ کیپر بلے باز شائی ہوپ لیڈ کر رہے ہیں۔

(جاری ہے)

کینگروز نے پہلے ٹی ٹونٹی میچ میں ویسٹ انڈین ٹیم کو 3 وکٹوں، دوسرے ٹی ٹونٹی میچ میں 8 وکٹوں،تیسرے میچ میں 6 وکٹوں جبکہ چوتھے ٹی ٹونٹی میچ میں 3 وکٹوں سے شکست دی تھی یوں مہمان کینگروز ٹیم کو میزبان ویسٹ انڈین ٹیم کے خلاف ٹی ٹونٹی سیریز میں 0-4 کی فیصلہ کن برتری حاصل ہوچکی ہے۔ دونوں ٹیموں کے درمیان پانچواں اور آخری ٹی ٹونٹی میچ 29 جولائی کو سینٹ کٹس کے مقام پر ہی کھیلا جائے گا۔