129 سال بعد انوکھا کارنامہ، انگلش باؤلر گس ایٹکنسن نے ٹیسٹ کرکٹ میں نئی تاریخ رقم کردی

چوٹ کے باعث سیریز کے ابتدائی چار میچز نہ کھیلنے والے ایٹکنسن نے شاندار انداز میں واپسی کی

ذیشان مہتاب ہفتہ 2 اگست 2025 12:09

129 سال بعد انوکھا کارنامہ، انگلش باؤلر گس ایٹکنسن نے ٹیسٹ کرکٹ میں نئی ..

لندن (اردو پوائنٹ تازہ ترین اخبار ۔ 2 اگست 2025ء ) انگلینڈ کے فاسٹ باؤلر گَس ایٹکنسن نے بھارت کے خلاف پانچویں اور آخری ٹیسٹ میچ کے دوسرے روز ایک نایاب ریکارڈ قائم کرتے ہوئے 129 سالہ پرانا کارنامہ دہرا دیا۔

چوٹ کے باعث سیریز کے ابتدائی چار میچز نہ کھیلنے والے ایٹکنسن نے شاندار انداز میں واپسی کی اور بھارت کے خلاف زبردست باؤلنگ کا مظاہرہ کرتے ہوئے 5 وکٹیں حاصل کیں۔

انہوں نے یشسوی جیسوال، دھروو جورَیل، واشنگٹن سندر، محمد سراج اور پرسدھ کرشنا کو پویلین کی راہ دکھائی۔

اس پانچ وکٹوں کی مدد سے ایٹکنسن نے اپنے ٹیسٹ کیریئر میں صرف 13 میچز میں 21 کی اوسط اور 34.9 کے اسٹرائیک ریٹ کے ساتھ 60 وکٹیں مکمل کیں۔

اس کارکردگی کے ساتھ انہوں نے 129 سال بعد وہ اعزاز اپنے نام کر لیا جو اس سے قبل صرف انگلینڈ کے عظیم باؤلر جارج لوہمن کو حاصل تھا جنہوں نے 1896ء میں 34.1 کے اسٹرائیک ریٹ کے ساتھ 60 وکٹیں حاصل کی تھیں۔

(جاری ہے)

آسٹریلیا کے سکاٹ بولینڈ 36 کے اسٹرائیک ریٹ کے ساتھ تیسرے نمبر پر ہیں۔

واضح رہے کہ اوول میں جاری پانچویں ٹیسٹ میں انگلینڈ نے ٹاس جیت کر بھارت کو پہلے بیٹنگ کی دعوت دی اور اسے 224 رنز پر آؤٹ کردیا۔ جواب میں انگلینڈ کی ٹیم اپنی پہلی اننگز میں 247 رنز پر ڈھیر ہو گئی اور اسے 23 رنز کی معمولی برتری حاصل ہوئی۔ دوسرے دن کے اختتام پر بھارت نے دوسری اننگز میں 2 وکٹوں کے نقصان پر 75 رنز بنا لیے تھے۔ یشسوی جیسوال 51 رنز کے ساتھ ناٹ آؤٹ ہیں جبکہ نائٹ واچ مین آکاش دیپ 4 رنز پر کریز پر موجود ہیں۔ بھارت کو 52 رنز کی برتری حاصل ہو چکی ہے۔