ملک کے معروف سیاحتی مقامات پر داخلے کیلئے انٹری فیس لازم قرار

اب کسی بھی سیاح کو ان مقامات میں بغیر فیس ادا کیے داخلے کی اجازت نہیں دی جائے گی

ساجد علی پیر 28 جولائی 2025 14:55

پشاور ( اُردو پوائنٹ اخبارتازہ ترین۔ 28 جولائی 2025ء ) ملک کے معروف سیاحتی مقامات پر داخلے کیلئے انٹری فیس لازم قرار دے دی گئی۔ میڈیا رپورٹس کے مطابق خیبرپختونخواہ کی صوبائی حکومت کی جانب سے ناران، کاغان، جھیل سیف الملوک سمیت دیگر سیاحتی مقامات پر داخلے کے لیے انٹری فیس لازمی قرار دی گئی ہے، جس کے تحت اب کسی بھی سیاح کو ان مقامات میں بغیر فیس داخلے کی اجازت نہیں دی جائے گی۔

سرکاری دستاویزات سے معلوم ہوا ہے کہ کاغان ویلی میں باقاعدہ طور پر انٹری فیس مقرر کرنے کا فیصلہ کیا گیا ہے، حسام آباد کے مقام پر انٹری فیس حاصل کرنے کے لیے پوائنٹ قائم کیا جائے گا جہاں بڑی گاڑیوں سے 200 روپے فی کس، چھوٹی گاڑیوں سے 100 روپے فی کس اور موٹر سائیکلوں سے 20 روپے بطور انٹری فیس وصول کی جائی گی، تاہم ان علاقوں مین رہنے والے مقامی افراد کو اس سے مستثنیٰ قرار دیا گیا ہے۔

(جاری ہے)

بتایا گیا ہے کہ انٹری فیس سے حاصل ہونے والی آمدن سے نا صرف کاغان ڈویلپمنٹ اتھارٹی کی مالی صورتحال بہتر ہوگی بلکہ سیاحوں کو مزید سہولیات بھی فراہم کی جا سکیں گی، اس حوالے سے سیکرٹری سیاحت ڈاکٹر عبدالصمد کا کہنا ہے کہ انٹری فیس کا مقصد آمدن بڑھانے کے ساتھ ساتھ سیاحوں کو معیاری سہولیات کی فراہمی کو یقینی بنانا ہے، بورڈ آف گورنرز نے انٹری فیس کے نفاذ کی باقاعدہ منظوری دے دی ہے اور جلد اس فیصلے پر عملدرآمد شروع کر دیا جائے گا۔

علاوہ ازیں خیبر پختونخواہ میں سیاحتی مقامات اور سیاحوں سے متعلق ایڈوائزری بھی جاری کی گئی ہے، جس میں محکمہ سیاحت نے کہا ہے کہ سیاحتی علاقوں میں 29 جولائی تک فلیش فلڈز کا خدشہ ہے، جس کے پیش نظر سیاح غیرضروری سفر نہ کریں، یہاں پہلے سے موجود سیاح خطرناک علاقوں کا غیرضروری سفر اور دریاؤں کے کنارے جانے سے گریز کریں اور سیاحتی مقامات پر جانے سے پہلے لوگ 1422 پر کال کریں۔