ایس ای سی پی نے سیٹلمنٹ سائیکل کو ایک دن تک کم کرنے کے روڈ میپ کا اعلان کر دیا

اسلام آباد (اُردو پوائنٹ اخبارتازہ ترین - اے پی پی۔ 28 جولائی2025ء) سکیورٹیز اینڈ ایکسچینج کمیشن آف پاکستان (ایس ای سی پی) کے چیئرمین نے پاکستان سٹاک ایکسچینج (پی ایس ایکس) میں ٹریڈ کی جانے والی سکیورٹیز کے لیے T+2 سے T+1 سیٹلمنٹ سائیکل میں منتقلی کے لیے 9 فروری 2026ء کی تاریخ کا اعلان کیا ہے۔ ایس ای سی پی کی جانب سے پیر کو یہاں جاری اعلامیہ کے مطابق یہ اعلان کراچی میں منعقدہ ایک تقریب میں کیا گیا جہاں پی ایس ایکس، این سی سی پی ایل، سی ڈی سی، پی ایم ای ایکس، سکیورٹیز بروکرز، بینکوں اور صنعت کی تنظیموں سمیت کئی اہم مارکیٹ شرکا موجود تھے۔

یہ منتقلی ایس ای سی پی کے سرمایہ کاروں کے مفادات کے تحفظ کے وسیع تر ایجنڈے کے مطابق ایک اہم سنگ میل کی نشاندہی کرتی ہے جو زیادہ رفتار، شفافیت اور مارکیٹ کی بڑھتی ہوئی کارکردگی کے ذریعے حاصل کیا جائے گا۔

(جاری ہے)

اس سے مارکیٹ کے شرکا کو کریڈٹ اور مارکیٹ کے خطرے کو نمایاں طور پر کم کر کے بھی فائدہ ہوتا ہے۔ مزید برآں اس تبدیلی سے مارکیٹ کی لیکویڈیٹی میں نمایاں بہتری آنے کی امید ہے کیونکہ تجارتیں اب تیزی سے طے ہو جائیں گی جس سے مارکیٹ میں اتار چڑھائو یا آپریشنل مسائل کی وجہ سے ڈیفالٹ کا امکان کم ہو جائے گا۔

چیئرمین ایس ای سی پی نے امریکا، چین، کینیڈا، میکسیکو اور ارجنٹائن جیسی ترقی یافتہ اور ابھرتی ہوئی مارکیٹوں کے نقش قدم پر چلتے ہوئے پاکستان کے T+1 سیٹلمنٹ سائیکل کو جلد اپنانے پر روشنی ڈالی۔ انہوں نے مزید زور دیا کہ پاکستان کا عالمی بہترین طریقوں کے ساتھ ہم آہنگی اس کے کیپیٹل مارکیٹس کی بڑھتی ہوئی پختگی، تیاری اور لچک کی عکاسی کرتی ہے۔

ایس ای سی پی کی رہنمائی میں این سی سی پی پی ایل نے اہم مارکیٹ سٹیک ہولڈرز کے ساتھ قریبی ہم آہنگی کے ذریعے اس منتقلی کی فعال طور پر قیادت کی ہے۔ اس عمل کی حمایت کے لیے ایس ای سی پی، سی ایم آئی آئیز، کسٹوڈین بینکوں اور سکیورٹیز بروکرز کے نمائندوں پر مشتمل ایک عمل درآمد کمیٹی تشکیل دی گئی تاکہ T+1 سیٹلمنٹ سائیکل میں ہموار، اچھی طرح سے مربوط تبدیلی کو یقینی بنایا جا سکے۔

اس سلسلے میں غیر ملکی سرمایہ کاروں کے ساتھ تفصیلی مشاورت بھی کی گئی۔عمل درآمد سے قبل چیئرمین نے تمام مارکیٹ شرکا کو مشورہ دیا کہ وہ اپنی آپریشنل تیاری کا جائزہ لینا شروع کر دیں تاکہ وہ کسی بھی ممکنہ چیلنجز کی بروقت شناخت اور ان سے نمٹ سکیں۔ مزید برآں اس عمل کو آسان بنانے کے لیے این سی سی پی پی ایل نے ایک روڈ میپ تیار کیا ہے جس میں مجوزہ T+1 سیٹلمنٹ میکانزم اور تفصیلی طریقہ کار کی رہنمائی شامل ہے جس کا مقصد آپریشنل خطرے کو کم کرتے ہوئے ہموار منتقلی کو ممکن بنانا ہے۔

یہ مارکیٹ ڈویلپمنٹ کا اقدام جدید کاری کی طرف ایک اہم قدم ہے اور اس سے نمایاں آپریشنل کارکردگی حاصل ہونے کی توقع ہے جبکہ ایس ای سی پی کے پاکستان کے کیپیٹل مارکیٹ ایکو سسٹم کو مضبوط بنانے اور عالمی معیار کے ساتھ ہم آہنگ ہونے کے عزم کو تقویت ملے گی۔