شوگر ملز، بروکرز، ہول سیل ڈیلرز ،کریانہ مرچنٹس میں چینی کی ہول سیل ،پرچون فروخت کا میکنزم نہ بن سکا

منگل 29 جولائی 2025 17:20

لاہور(اُردو پوائنٹ اخبارتازہ ترین - این این آئی۔ 29 جولائی2025ء)شوگر ملز، بروکرز، ہول سیل ڈیلرز اور کریانہ مرچنٹس میں ابھی تک چینی کی ہول سیل اور پرچون فروخت کا میکنزم نہیں بن سکا جس کے باعث چینی کی قلت پیداہونا شروع ہو گئی۔مارکیٹ ذرائع کے مطابق گزشتہ 13روز سے چینی کی ہول سیل سپلائی بند ہے جس سے کریانہ اسٹور ز کے پاس اسٹاک ختم ہوگیا جن کے پاس چینی رہ گئی ہے وہ صرف جاننے والے گاہکوں کو200 روپے کلو فروخت کررہے ہیں۔

کریانہ مرچنٹس نے کہا ہے کہ ہمیں ہول سیل میں چینی165روپے کلو فراہم کی جائے تو ہم 173روپے کلو پر فروخت کرنے کو تیار ہیں۔دوسری جانب، انتظامیہ نے گزشتہ 24گھنٹوں میں مہنگی چینی فروخت کرنے اور ذخیرہ کرنے پر 127دکانداروں کے چالان کیے جبکہ 7دکانداروں کو گرفتار کرکے مجموعی طور پر 2لاکھ 28ہزار روپے جرمانہ کیا گیا، 4دکانیں سیل بھی کی گئیں۔

(جاری ہے)

لاہور میں پہلے چھوٹے بڑے ڈیپارٹمنٹ اسٹورز اور اب گلی محلوں میں واقع کریانہ دکانوں سے بھی چینی غائب ہوگئی۔

ملز مالکان، تھوک اور پرچون فروش کسی جگہ بھی سرکاری ریٹ پر چینی دستیاب نہیں۔ تھوک کاروبار کرنے والے ملز مالکان جبکہ چھوٹے دکاندار تھوک کا کاروبار کرنے والوں پر الزام لگا رہے ہیں۔دکانداروں کا کہنا ہے کہ جب سے حکومت نے سرکاری ریٹ مقرر کیا ہے چینی غائب ہوگئی ہے، حکومت اگر ملز مالکان پر قابو پا لے تو چینی سرکاری ریٹ پر عوام کو دستیاب ہو سکتی ہے۔