باغ انتظامیہ کا تجاوزات کے خلاف آپریشن،تھڑے، ریڑھیاں، غیرقانونی پارکنگ ختم اور بھاری جرمانے

بدھ 30 جولائی 2025 18:56

باغ (اُردو پوائنٹ اخبارتازہ ترین - اے پی پی۔ 30 جولائی2025ء) باغ انتظامیہ نے تجاوزات کے خلاف آپریشن کرتے ہوئے تھڑے، ریڑھیاں، غیرقانونی پارکنگ ختم اور جرمانے کیے جبکہ شٹرز کے باہر رکھا سامان دکانوں کے اندر رکھوا دیا گیا۔

(جاری ہے)

ڈپٹی کمشنر باغ راجہ صداقت کی ہدایت پر اسسٹنٹ کمشنر باغ سید کلیم عباس نے میونسپل کارپوریشن اور پولیس نفری کے ہمراہ شہر کا دورہ کیا جہاں پر تھڑے ہٹائے گئے اور شہر کے اندر سڑک پر لگائے گئے موٹر سائیکل ضبط کر دیئے گئے،شٹرزکے باہر سڑک پر رکھا ہوا سامان شٹرز کے اندر رکھنے ہدایات جاری کی گئیں اور موقع پر ہی سامان اندر رکھوا دیا گیا جبکہ سڑک پر لگی ریڑھیاں ہٹا دی گئیں۔

اس موقع پر اے سی باغ نے میڈیا سے بات چیت کرتے ہوئے کہا کہ شہر کو تجاوزات سے پاک کرنے کا عزم کر رکھا ہے شہر کے اندر لاقانونیت کو فروغ دینے والوں کو قانون کے کٹہرے میں لائیں گے۔تاجران انتظامیہ سے تعاون کریں سڑک پیدل چلنے والوں اور گاڑیوں کے لیے ہے اس پر سامان نہ رکھیں اپنی گاڑی اور موٹر سائیکل مختص شدہ پارکنگ میں لگائیں۔ باغ کے شہری اور تاجران انتظامیہ کے ساتھ مل کر شہر کو تجاوزات سے پاک کرنے میں اپنا کردار ادا کریں۔