چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت سی ڈی اے بورڈ کے اجلاس کا انعقاد

اسلام آباد (اُردو پوائنٹ اخبارتازہ ترین - اے پی پی۔ 30 جولائی2025ء) چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت سی ڈی اے بورڈ کا چودھواں اجلاس سی ڈی اے ہیڈکوارٹرز اسلام آباد میں منعقد ہوا۔ اجلاس میں ممبر ایڈمن و سٹیٹ طلعت محمود، ممبر فنانس طاہر نعیم، ممبر انوائرمنٹ اسفندیار بلوچ، ممبر پلاننگ ڈاکٹر خالد حفیظ، ممبر انجینئرنگ سید نفاست رضا جبکہ پروفیسر ڈاکٹر محمد علی وائس چانسلر پنجاب یونیورسٹی نے بذریعہ زوم لنک شرکت کی۔

سی ڈی اے بورڈ کے اجلاس میں متعدد ایجنڈا آئٹمز زیر بحث آئے جن کی تفصیل درج ذیل ہے۔اجلاس میں سی ڈی اے کے کمرشل پلاٹوں کی شاندار نیلامی کی منظوری ، سی ڈی اے کے فنانشل مینجمنٹ سسٹم کی بہتری کے لیے آڈٹ فرم کی تعیناتی کی منظوری کے علاوہ مندرجہ زیل فیصلے کیے گئے۔

(جاری ہے)

اجلاس میں بتایا گیا کہ سی ڈی اے نے سال 2025 میں کمرشل پلاٹوں اور دوکانوں کی شاندار نیلامی کے ذریعے 19.56 ارب روپے کے 8 پلاٹس اور 4 دکانیں فروخت کیں ۔

مزیدبرآں سی ڈی اے نے 15 سے 17 جولائی 2025 تک ہونے والی بولی میں پلاٹس اور دکانیں مجموعی طور پر مارکیٹ ویلیو سے 11 فیصد سے زائد رقم میں فروخت کیں ،اس طرح بعض پلاٹس ریزروپرائس سے 33 فیصد زیادہ رقم میں فروخت ہوئے۔اس کے علاوہ سی ڈی اے نے اقساط کی رقم 2 سال کی بجائے ایک سال اور یکمشت ادائیگی کی صورت میں 10 فیصد کی بجائے 5 فیصد کی سخت شرائط رکھیں ،اس کے باوجود نہ صرف سی ڈی اے کے کمرشل پلاٹس اور دوکانوں کی کمرشل پلاٹوں کی سال 2025 کی شاندار اور کامیاب نیلامی ثابت ہوئی بلکہ اس میں مالی طور پر مضبوط، مستحکم اور سنجیدہ کاروباری شخصیات نے شرکت کر کے سی ڈی اے پر نہ صرف اپنے بھرپور اعتماد کا اظہار کیا بلکہ نیلامی کو کامیاب بنانے میں بھی اہم کردار ادا کیا۔

اجلاس کو بتایا گیا کہ سی ڈی اے کی پانچ سالہ فنانشل اسٹیٹمنٹ کی تیاری کیلئے آڈٹ فرم کی خدمات حاصل کرنے کیلئے چارٹرڈ فرمز نے بولی لگائی، جن میں سے کے پی ایم جی تکنیکی طور پر کوالیفائی کر گئی۔ اجلاس کو بتایا گیا کہ یہ فرم سی ڈی اے کے تمام اثاثوں کا تفصیلی جائزہ لے گی اور مالیاتی گورننس کے نظام کو بہتر بنائے گی۔ چیئرمین سی ڈی اے نے ہدایت کی کہ اس منصوبے کو 6 ماہ کے اندر مکمل کیا جائے۔

اجلاس میں اسلام آباد کے شہری اور دیہی علاقوں میں سالڈ ویسٹ مینجمنٹ کو آؤٹ سورس کرنے کے نئے ٹینڈر کے عمل کی منظوری دے دی گئی۔ سی ڈی اے بورڈ نے نئے سرے سے قومی اور بین الاقوامی شہرت کی حامل فرموں پر نئے ٹینڈر طلب کرنے کا فیصلہ کیا۔ اجلاس میں فیصلہ کیا گیا کہ کوڑا کرکٹ اٹھانے کے نظام کو مختلف پیکیجز میں تقسیم کیا جائے گا۔ چیئرمین سی ڈی اے نے ویسٹ ٹرانسفر سٹیشنز اور ڈمپنگ سائٹس کے معیار کو مزید بہتر اور مؤثر بنانے کی ہدایت کی۔

اجلاس میں راولپنڈی ویسٹ مینجمنٹ کمپنی (آر ڈبلیو ایم سی) کے ساتھ کوڑا کرکٹ اٹھانے کے معاہدے کی مدت میں مزید تین ماہ کی توسیع کی منظوری بھی دی گئی ۔ اجلاس میں چیئرمین سی ڈی اے کی ہدایت پر انوائرمنٹ کیڈر کے ڈائریکٹر (بی ایس-19) کی سنیارٹی کا تعین کرنے کیلئے ممبر ایڈمن، ممبر انوائرمنٹ اور ممبر فنانس پر مشتمل کمیٹی تشکیل دینے کا فیصلہ کیا گیا۔

اسی طرح اجلاس میں سب انجینئرز کی پروموشن کے نئے طریقہ کار کو سروس رولز کمیٹی کے پاس بھیجنے کا فیصلہ گیا ہے تاکہ اس کا مکمل جامع جائزہ لیا جا سکے۔ سی ڈی اے بورڈ کے اجلاس میں مالی سال 26-2025 کے بجٹ کے تخمینہ جات کو تمام شعبہ جات کی جانب سے پیش کی گئی تجاویز کی روشنی میں منظوری دی گئی۔ سی ڈی اے بورڈ کے اجلاس میں سی ڈی اے کے واٹر چارجز کیش لیس نظام کے تحت وصول کرنے کا فیصلہ کیاگیا۔ چیئرمین سی ڈی اے نے کہا کہ اسلام آباد کی ترقی، خوشحالی اور خوبصورتی سی ڈی اے کی اولین ترجیح ہے۔ اسلام آباد کے شہریوں کو ہاوسنگ اور ٹرانسپورٹ کی بہترین سہولیات فراہم کرنے کے لئے تمام وسائل اور کاوشیں کی جارہی ہیں تاکہ اسلام آباد کو ایک مثالی دارالحکومت بنانے میں مدد مل سکے۔