امریکہ کے ساتھ معاہدے سے باہمی ٹیرف میں کمی اور دونوں ملکوں کو ایک دوسرے کی منڈیوں تک بہتر رسائی میسر آئیگی، وزارت خزانہ

امریکہ میں پاکستانی مصنوعات پر لگنے والا ٹیرف کم ہوگا،معاہدے کا مقصد دو طرفہ تجارت کا فروغ، منڈی تک رسائی کو بڑھانا، سرمایہ کاری کو راغب کرنا اور باہمی دلچسپی کے شعبوں میں تعاون کو فروغ دینا ہے

فیصل علوی جمعرات 31 جولائی 2025 11:11

امریکہ کے ساتھ معاہدے سے باہمی ٹیرف میں کمی اور دونوں ملکوں کو ایک دوسرے ..

اسلام آباد(اردوپوائنٹ اخبار تازہ ترین۔31جولائی 2025)وزارت خزانہ نے اعلامیہ جاری کرتے ہوئے کہا ہے کہ پاکستان اور امریکہ کے درمیان اہم تجارتی معاہدہ کامیابی سے طے پا گیا ہے، امریکہ کے ساتھ معاہدے سے باہمی ٹیرف میں کمی اور دونوں ملکوں کو ایک دوسرے کی منڈیوں تک بہتر رسائی میسر آئیگی،معاہدے کا مقصد دو طرفہ تجارت کا فروغ، منڈی تک رسائی کو بڑھانا، سرمایہ کاری کو راغب کرنا اور باہمی دلچسپی کے شعبوں میں تعاون کو فروغ دینا ہے۔

وزارت خزانہ کے مطابق یہ پیش رفت وزیر خزانہ سینیٹر محمد اورنگزیب کی امریکی وزیر تجارت ہاورڈ لوٹنک اور امریکی تجارتی نمائندے جیمیسن گریر سے ملاقات کے دوران ہوئی۔ملاقات میں سیکرٹری کامرس جواد پال اور امریکا میں پاکستان کے سفیر رضوان سعید شیخ بھی موجود تھے۔

(جاری ہے)

اعلامیے میں کہا گیا کہ معاہدے کے نتیجے میں باہمی ٹیرف میں کمی آئے گی۔ دونوں ملکوں کو ایک دوسرے کی منڈیوں تک بہتر رسائی میسر آئے گی۔

خاص طور پر امریکہ میں پاکستانی مصنوعات پر لگنے والا ٹیرف کم ہوگا۔وزارت خزانہ کے مطابق پاک امریکا معاہدے کے نتیجے میں باہمی ٹیرف خاص طور پر امریکہ میں پاکستانی مصنوعات پر لگنے والے ٹیرف میں کمی آئے گی۔اعلامیے میں کہا گیا کہ یہ معاہدہ دونوں ملکوں کے درمیان اہم اقتصادی شعبوں خاص طور پر توانائی، معدنیات، آئی ٹی، کرپٹو کرنسی اور دیگر میں اقتصادی تعاون کے ایک نئے دور کے آغاز کا باعث بنے گا۔

وزارت خزانہ کے مطابق اس معاہدے کے تحت دونوں ملکوں کو ایک دوسرے کی منڈیوں تک بہتر رسائی میسر آئے گی اور پاکستان کے بنیادی ڈھانچے اور ترقیاتی منصوبوں میں امریکی سرمایہ کاری میں اضافہ متوقع ہے۔اعلامیے میں کہا گیا کہ یہ تجارتی معاہدہ دونوں ممالک کی قیادت کی جانب سے دوطرفہ تعلقات کو مزید گہرا کرنے اور تجارت اور سرمایہ کاری روابط کو مضبوط بنانے کیلئے تمام کوششوں کو بروئے کار لانے کے عزم کی نشاندہی کرتا ہے۔