لیون مارچنڈ کا تاریخی کارنامہ، 200 میٹر میڈلے کا ورلڈ ریکارڈ توڑ ڈالا

جمعرات 31 جولائی 2025 17:00

سنگاپور (اُردو پوائنٹ اخبارتازہ ترین - این این آئی۔ 31 جولائی2025ء)فرانس کے نوجوان تیراک لیون مارچنڈ نے ورلڈ ایکواٹکس چیمپئن شپس میں 200 میٹر میڈلے کا نیا عالمی ریکارڈ قائم کر کے تاریخ رقم کر دی۔ سنگاپور میں ہونے والے ان مقابلوں کے سیمی فائنل میں انہوں نے شاندار تیراکی کرتے ہوئے یہ کارنامہ سرانجام دیا۔

(جاری ہے)

برطانوی نشریاتی ادارے بی بی سی کے مطابق 23 سالہ لیون مارچنڈ نے 1 منٹ 52.69 سیکنڈز میں فاصلہ طے کیا اور ریان لوچٹے کا 2011ء میں قائم کردہ 1 منٹ 54.00 سیکنڈز کا ریکارڈ توڑ ڈالا، اس شاندار کامیابی کے بعد وہ فائنل کے لیے بھی کوالیفائی کر گئے۔

مارچنڈ نے پیرس اولمپکس 2024ء میں چار طلائی تمغے جیتے تھے، انہوں نے ریکارڈ کے بعد جذباتی انداز میں کہا کہ مجھے یقین نہیں آ رہا، میں جانتا تھا کہ آج اچھا پرفارم کروں گا لیکن 1:52 کا وقت میرے لیے ناقابلِ یقین ہے۔اسی ریس میں برطانیہ کے ڈنکن اسکاٹ نے 1:55.51 سیکنڈز کے وقت کے ساتھ تیسری پوزیشن حاصل کی اور فائنل کے لیے کوالیفائی کر لیا۔