پاکستان کی آئی ٹی برآمدات تاریخی سطح پر پہنچ گئیں

آئی ٹی کی خدمات کی برآمدات میں گزشتہ مالی سال کے دوران58 کروڑ 60 لاکھ امریکی ڈالر کا اضافہ 14 ہزار 890 آئی ٹی کمپنیاں اور 7 ہزار 400 کال سینٹرز بھی رجسٹرڈ ہوئے ہیں، حکام

جمعرات 31 جولائی 2025 21:50

اسلام آباد(اُردو پوائنٹ اخبارتازہ ترین - این این آئی۔ 31 جولائی2025ء)پاکستان کی آئی ٹی برآمدات تاریخی سطح پر پہنچ گئیں،آئی ٹی کی خدمات کی برآمدات میں گزشتہ مالی سال کے دوران 58 کروڑ 60 لاکھ امریکی ڈالر کا اضافہ ہوگیا۔پاکستان پیپلزپارٹی کی سینیٹر پلوشہ خان کی زیر صدارت سینیٹ کی قائمہ کمیٹی برائے آئی ٹی کے اجلاس میں پاکستان کی آئی ٹی برآمدات کی تفصیل پیش کی گئی۔

سینیٹ کمیٹی کو بتایا گیاکہ پاکستان میں آئی ٹی کی خدمات کی برآمدات میں گزشتہ مالی سال کے دوران 58 کروڑ 60 لاکھ امریکی ڈالر کا اضافہ اورمجموعی حجم 3 ارب80 کروڑ ڈالر ہوگیا ہے۔پاکستان سافٹ ویئر ایکسپورٹ بورڈ کے مطابق آئی سی ٹی خدمات میں18 فیصد اضافہ ہوا، 24-2023 میں برآمدات 3.223 ارب امریکی ڈالر تھیں تاہم برآمدات کا حجم بڑھ کر3.809 ارب امریکی ڈالر تک پہنچ گیا ہے۔

(جاری ہے)

پی ایس ای بی نے بتایاکہ جون 2025 میں خدمات کی برآمدات سے 33کروڑ80 لاکھ امریکی ڈالر آئے،جون کے مہینے میں اب تک کی سب سے زیادہ آئی ٹی ترسیلات جمع ہوئی ہیں اور عالمی اقتصادی چیلنجوں کے باوجود آئی ٹی برآمدات میں اضافہ خوش آئند ہے۔بتایاگیا کہ زیرجائزہ عرصے کے دوران22 ہزار سے زائد آئی ٹی کمپنیاں اور کال سینٹرز رجسٹرڈ ہوئے، 14 ہزار 890 آئی ٹی کمپنیاں اور 7 ہزار 400 کال سینٹرز بھی رجسٹرڈ ہوئے ہیں۔