چیئرمین آئی اے ٹی ایف میجر جنرل عبدالمعید کی زیر صدارت آئی اے ٹی ایف کا 19واں اجلاس

اسلام آباد (اُردو پوائنٹ اخبارتازہ ترین - اے پی پی۔ 31 جولائی2025ء) انٹر ایجنسی ٹاسک فورس (آئی اے ٹی ایف) کا 19واں اجلاس اے این ایف ہیڈکوارٹرز راولپنڈی میں منعقد ہوا، چیئرمین آئی اے ٹی ایف میجر جنرل عبدالمعید ہلال امتیاز (ملٹری) نے اجلاس کی صدارت کی۔اجلاس میں ڈائریکٹر جنرل پاکستان کوسٹ گارڈز میجر جنرل جواد ریاض، ڈائریکٹر جنرل پاکستان میری ٹائم سکیورٹی ایجنسی ریئر ایڈمرل شہزاد اقبال ستارہ امتیاز (ملٹری)، ایڈیشنل انسپکٹر جنرل آف پولیس خیبرپختونخوا محمد علی بابا خیل اور دیگر وفاقی و صوبائی اداروں کے سینئر نمائندگان نے شرکت کی۔

تقریب کے آغاز میں چیئرمین آئی اے ٹی ایف و ڈی جی میجر جنرل عبدالمعید ہلال امتیاز (ملٹری) نے اجلاس میں شریک ممبران کے درمیان رابطوں اور کوآرڈینیشن کو مزید بہتر بنانے کی ضرورت پر زور دیا تا کہ منشیات کے خلاف مؤثر انداز میں جنگ لڑی جاسکے۔

(جاری ہے)

سیکرٹری آئی اے ٹی ایف بریگیڈیئر سید عمران علی نے منشیات کی سمگلنگ کے خطرات، ان کے تدارک کی حکمت عملی اور درپیش چیلنجز پر تفصیلی بریفنگ دی۔

منشیات اور پریکرسر کیمیکلز کے نئے رجحانات خاص طور پر میتھ ایمفیٹامائن (آئس) کے بڑھتے ہوئے استعمال پر تبادلہ خیال ہوا۔تعلیمی اداروں میں انسداد منشیات مہم 2025-26 کی منصوبہ بندی زیرِ بحث رہی۔ پوست تلفی مہم 2025-26 کے لئے اداروں کی مشترکہ مربوط حکمت عملی پر زور دیا گیا۔متعلقہ اداروں کے درمیان معلومات کا تبادلہ، مشترکہ آپریشنز اور متعلقہ اداروں کے اہلکاروں کی درکار تربیت کے لئے لائحہ عمل طے کیا گیا۔

مشترکہ آپریشنل فریم ورک میں بہتری اوراجلاس میں شریک اداروں  کے درمیان باہمی اشتراک کے لیے مفاہمتی یادداشتوں (ایم او یوز) پر دستخط کئے گئے۔چیئرمین آئی اے ٹی ایف میجر جنرل عبدالمعید ہلال امتیاز (ملٹری) نے اپنے اختتامی کلمات میں تمام شرکاء کا شکریہ ادا کیا اور کہا کہ اس اجلاس کی کامیابی صرف معیاری مکالمے میں نہیں بلکہ ان فیصلوں پر مؤثر عملدرآمد میں ہے جن پر باہمی اتفاقِ رائے سے عمل کیا جائے۔

ڈی جی اے این ایف نے تمام اسٹیک ہولڈرز پر زور دیا کہ باہمی تعاون کو فروغ دیتے ہوئے مل کر منشیات کے خلاف مشترکہ محاذ پر کام جاری رکھیں۔ واضح رہے کہ انٹر ایجنسی ٹاسک فورس 32 وفاقی اور صوبائی قانون نافذ کرنے والے اداروں پر مشتمل ایک مشترکہ پلیٹ فارم ہے، جو ممبران کی آپس کی رابطہ کاری کا ذریعہ ہی نہیں بلکہ منشیات کے خلاف قومی عزم کی عملی تصویر ہے۔ یہاں یکسو حکمتِ عملیوں اور انٹیلی جنس معلومات کے آپس میں تبادلے شیئر کرکے منشیات کے خلاف آپریشنز کو ہم آہنگ کیا جاتا ہے تاکہ مؤثر نتائج حاصل کئے جا سکیں۔