راولپنڈی کے مختلف تھانوں میں سیاسی جماعت کے 65راہنماؤں و کارکنوں کے خلاف درج مقدمات پر گرفتاری کے احکامات

جمعہ 1 اگست 2025 18:37

راولپنڈی (اُردو پوائنٹ اخبارتازہ ترین - اے پی پی۔ 01 اگست2025ء) راولپنڈی کے مختلف تھانوں میں سیاسی جماعت کے 65رہنماؤں و کارکنوں کے خلاف درج مقدمات پر گرفتاری کے عدالتی احکامات جاری ہوئے ہیں ۔پولیس ترجمان کے مطابق 26 نومبر احتجاج کے حوالے سے صادق آباد، واہ کینٹ اور نصیر آباد کے مقدمات میں عدالتی احکامات جاری کئے گئے،احکامات انسداد دہشت گردی عدالت نے جاری کئے ہیں۔

پی ٹی آئی کے 65 رہنماؤں و کارکنان کے ناقابل ضمانت وارنٹ گرفتاری جاری ہوئے، ملزمان کے گرفتاری سے بچنے کے لئے روپوش ہونے پر وارنٹ جاری کئے گئے ہیں۔ صادق آباد کے مقدمہ میں 28 ملزمان کے وارنٹ گرفتاری جاری کئے گئے، واہ کینٹ کے مقدمہ میں 18 ملزمان کے وارنٹ گرفتاری جاری کئے گئے،نصیر آباد کے مقدمہ میں 19 ملزمان کے وارنٹ گرفتاری جاری کئے گئے، ملزمان میں عارف علوی، علی امین گنڈا پور، علیمہ خان، عمر ایوب، زبیر نیازی، فرخ محمد سیال، حماد اظہر ،مطیع اللہ شاہ، کنول شوزب، شیخ وقاص اکرم، اعجاز خان جازی، کرنل اجمل صابر، عامر مغل، سردار منصور اور میاں اسلم اقبال بھی شامل ہیں۔

(جاری ہے)

صادق آباد کے مقدمہ میں 18 دیگر ملزمان کے عدم حاضری کی بنیاد پر وارنٹ بھی جاری کئے گئے، ملزمان کو گرفتار کر کے عدالت میں پیش کیا جائے گا،ملزمان کی گرفتاری کے لئے ٹیمیں تشکیل دے دی گئی ہیں، مختلف علاقوں میں چھاپے مارے جا رہے ہیں۔