لاہور میں مسافر ٹرین کو تشویش ناک حادثہ، متعدد مسافر زخمی

لاہور سے راولپنڈی جانے والی مسافر ٹرین کالا شاہ کاکو کے مقام پر ڈیل ریل ہو گئی

محمد علی جمعہ 1 اگست 2025 21:10

لاہور (اُردو پوائنٹ اخبارتازہ ترین۔ 01 اگست2025ء) لاہور میں مسافر ٹرین کو تشویش ناک حادثہ، متعدد مسافر زخمی، لاہور سے راولپنڈی جانے والی مسافر ٹرین کالا شاہ کاکو کے مقام پر ڈیل ریل ہو گئی۔ تفصیلات کے مطابق لاہور سے راولپنڈی جانے والی اسلام آباد ایکسپریس کو کالاشاہ کاکو کے قریب خوفناک حادثہ پیش آیا ہے جہاں پلانٹ سمیت ٹرین کی متعدد کوچز پٹڑی سے اترنے سمیت الٹ گئیں۔

حادثے کے بعد ٹریک پر ٹرینوں کی آمدورفت معطل ہوگئی اور گرین لائن اور ریل کاروں سمیت متعدد ریل گاڑیاں پھنس گئیں۔ حادثے کے نتیجے میں 28 افراد کے زخمی ہونے کی اطلاعات ہیں، زخمیوں کو موقع پر طبی امداد دی جارہی ہے، ریسکیو ٹیمیں موقع پر روانہ کر دی گئی ہیں تاہم ابتدائی اطلاعات کے مطابق امدادی ٹیمیں تاحال حادثے کے مقام پر نہیں پہنچ سکیں۔

(جاری ہے)

حادثے کے بعد مسافر اپنی مدد آپ کے تحت امدادی کارروائیوں میں مصروف ہیں۔ اسلام آباد ایکسپریس لاہور سے راولپنڈی جارہی تھی، ٹرین شام 6 بجے لاہور سے روانہ ہوئی تھی۔ وفاقی وزیر ریلوے حنیف عباسی نے کالا شاہ کاکو کے قریب اسلام آباد ایکسپریس ٹرین کے پٹڑی سے اترنے کے واقعے کا نوٹس لیتے ہوئے چیف ایگزیکٹیو آفیسر( سی ای او) ریلوے اور ڈویژنل سپرنٹنڈنٹ ( ڈی ایس) ریلوے کو جائے حادثہ پر پہنچنے کی ہدایت کردی۔

حنیف عباسی نے ریلوے کے عملے کو امدادی کاموں کو تیز کرنے اور طبی عملے کو فوراً موقع پر پہنچنے کی ہدایت بھی کی ہے۔ وزیر ریلوے نے حادثے کی انکوائری کا حکم جاری کرتے ہوئے 7 روز میں رپورٹ پیش کرنے کی ہدایت کردی۔ دریں اثنا وزیراعظم شہباز شریف نے اسلام آباد ایکسپریس حادثے پر اظہار افسوس کرتے ہوئے ریسکیو ٹیموں کو آپریشن تیز کرنے کی ہدایت کی ہے۔