پنجاب حکومت نوجوانوں کوکھیلوں کی مثبت سرگرمیوں کی جانب راغب کرنے کے مشن پر کاربند ہے، سیکریٹری سپورٹس پنجاب

ہفتہ 2 اگست 2025 21:02

شورکوٹ (اُردو پوائنٹ اخبارتازہ ترین - اے پی پی۔ 02 اگست2025ء) سیکریٹری سپورٹس پنجاب مظفر خان سیال نے ڈپٹی کمشنر علی اکبر بھنڈرکے ہمراہ تحصیل سپورٹس کمپلیکس اٹھارہ ہزاری کا افتتاح کیا۔ اس موقع پر دیگر ضلعی افسران و اہلیان علاقہ کی کثیر تعداد بھی موجود تھی۔ سیکریٹری سپورٹس پنجاب مظفر خان سیال نے افتتاحی تقریب سے خطاب کرتے ہوئے کہا کہ سپورٹس کی سرگرمیوں کے حوالہ سے تحصیل اٹھارہ ہزاری میں سپورٹس کمپلیکس کاقیام عمل میں لایا گیا ہے، اس 170 ملین لاگت سے تعمیر ہونے والے سپورٹس کمپلیکس میں کرکٹ، فٹبال گراؤنڈ،بیڈمنٹن،ٹیبل ٹینس باسکٹ بال،اوپن جم،پلے لینڈ شامل ہیں۔

انہوں نے کہا کہ وزیراعلیٰ پنجاب کے ویژن کے مطابق صوبے بھر میں سپورٹس انفراسٹرکچر کا جال بچھایا جا رہا ہے تاکہ نوجوانوں کو مثبت سرگرمیوں کی جانب راغب کیا جا سکے۔

(جاری ہے)

صوبائی سیکرٹری سپورٹس نے اس بات پر زور دیا کہ پنجاب حکومت نوجوانوں کوکھیلوں کی مثبت سرگرمیوں کی جانب راغب کرنے کے مشن پر کاربند ہیں۔ تحصیل سپورٹس کمپلیکس اٹھارہ ہزاری کا قیام اسی سلسلہ کی ایک اہم کڑی ہے اور علاقے کے نوجوانوں کے لیے تحفہ ہے، یہ کمپلیکس مقامی سطح پر کھلاڑیوں کے ٹیلنٹ کوبہتر انداز میں ابھارے کےلئے بھی موزوں ہے۔افتتاحی تقریب میں سپورٹس کے شوقین نوجوانوں، علاقہ مکینوں اور معزز شخصیات نے بڑی تعداد میں شرکت کی۔\378