دوسرے ٹی ٹوئنٹی میں سنسنی خیز مقابلہ؛ ویسٹ انڈیز نے پاکستان کو 2 وکٹوں سے شکست دیدی

ویسٹ انڈیز کو آخری 2 اوورز میں 24 رنز درکار تھے، فاسٹ باؤلرز دفاع نہ کرسکے، سیریز ایک ایک سے برابر

ساجد علی اتوار 3 اگست 2025 10:17

دوسرے ٹی ٹوئنٹی میں سنسنی خیز مقابلہ؛ ویسٹ انڈیز نے پاکستان کو 2 وکٹوں ..

فلوریڈا ( اُردو پوائنٹ اخبارتازہ ترین۔ 03 اگست 2025ء ) ویسٹ انڈیز نے دوسرے ٹی ٹوئنٹی میں سنسنی خیز مقابلے کے بعد پاکستان کو 2 وکٹوں سے شکست دے کر 3 میچز کی سیریز ایک ایک سے برابر کردی۔ تفصیلات کے مطابق فلوریڈا میں کھیلی جانے والی 3 میچز کی سیریز کے دوسرے ٹی ٹوئنٹی میچ میں پاکستانی ٹیم نے ٹاس جیت کر ویسٹ انڈیز کے خلاف بیٹنگ کا فیصلہ کیا اور مقررہ اوورز میں مہمان ٹیم کو جیت کے لیے 134 رنز کا ہدف دیا، اننگز کے آغاز سے ہی پاکستان کی بیٹنگ کا آغاز اچھا نہ رہا، صائم ایوب 7 ، صاحبزادہ فرحان 3 اور محمد حارث 4 رنز بناکر آؤٹ ہوگئے، فخر زمان نے 20 ، سلمان آغا نے 38 اور حسن نواز نے 40 رنز بنائے، ویسٹ انڈیز کے جیسن ہولڈر نے 4 وکٹیں لیں۔

(جاری ہے)

بتایا گیا ہے کہ پاکستان نے ہدف کے دفاع کے لیے ویسٹ انڈیز کو سپن کے ذریعے قابو کیا تاہم فاسٹ باؤلرز رنز روکنے میں ناکام رہے، ویسٹ انڈیز کو آخری 2 اوورز میں 24 رنز درکار تھے، جن میں سے 19 ویں اوور میں حسن علی 16 رنز دے بیٹھے، شاہین شاہ آفریدی نے آخری اوور میں 8 رنز بچانے کی کوشش کی لیکن انہیں بھی آخری گیند پر چوکا پڑگیا اور ویسٹ انڈیز کی ٹیم 2 وکٹوں سے میچ جیت گئی، گوڈا کیش موٹی 28 رنز بناکر نمایاں رہے، پاکستان کے محمد نواز نے 3، صائم ایوب نے 2اور صفیان مقیم نے ایک وکٹ لی۔