یومِ آزادی "معرکہ حق" کے عنوان سے منانے کا فیصلہ،وزیراعلی سندھ کی صدارت میں یومِ آزادی کی تیاریوں پر اہم اجلاس

ہفتہ 2 اگست 2025 22:16

کراچی (اُردو پوائنٹ اخبارتازہ ترین - این این آئی۔ 02 اگست2025ء)وزیراعلی سندھ سید مراد علی شاہ کی صدارت میں یومِ آزادی کی تقریبات کے حوالے سے ایک اہم اجلاس منعقد ہوا جس میں میڈیا، سول سوسائٹی، شوبز، کھیلوں، صحافت اور قومی کھلاڑیوں کے نمائندوں نے شرکت کی۔ اجلاس کا مرکزی موضوع "معرکہ حق" رکھا گیا تھا۔ اجلاس میں صوبائی وزرا شرجیل انعام میمن، سید ناصر حسین شاہ، سعید غنی، ذوالفقار شاہ سمیت وزیراعلی سندھ کے سیکریٹری رحیم شیخ، سیکریٹری جنرل ایڈمنسٹریشن محمد علی کھوسو، سیکریٹری اطلاعات، اور سیکریٹری ثقافت خیر محمد بھی شریک تھے۔

اجلاس میں شرکت کرنے والی نمایاں شخصیات میں فیصل ایدھی، جہانگیر خان، معین خان، سینئر اداکار مصطفی قریشی، منور سعید، احمد شاہ، سینئر صحافی غازی صلاح الدین، اور قومی کھلاڑی یونس خان اور نسیم حمید شامل تھے، جو یومِ آزادی کی تقریبات کے لیے ایک متحدہ محاذ کی علامت تھے۔

(جاری ہے)

وزیراعلی مراد علی شاہ نے اپنے خطاب میں کہا کہ اس سال کی تقریبات صرف جشنِ آزادی منانے تک محدود نہیں بلکہ ظلم کے خلاف ایک تاریخی فتح کی یاد بھی ہیں۔

انہوں نے زور دیا کہ مختلف مکاتبِ فکر سے تعلق رکھنے والے تمام دانشور ان تقریبات میں بھرپور حصہ لیں۔انہوں نے بتایا کہ وہ پہلے ہی مختلف مذاہب کے علمائے کرام اور رہنماں سے آزادی کی اہمیت کے حوالے سے بات چیت کر چکے ہیں۔ معروف شخصیات کو مدعو کرنے کا مقصد ان کی آرا حاصل کرنا اور ان کی شمولیت کو یقینی بنانا ہے۔اجلاس میں سینئر وزیر شرجیل میمن نے آگاہ کیا کہ سندھ حکومت نے یکم اگست سے یومِ آزادی کی تقریبات کا باقاعدہ آغاز کر دیا ہے اور اس سلسلے میں 162 مختلف تقاریب بشمول کھیل، ثقافت، موسیقی اور دیگر سرگرمیاں منعقد کی جائیں گی۔

تمام شریک کھلاڑیوں، فنکاروں اور صحافیوں نے ان تقریبات میں بھرپور شرکت کی یقین دہانی کرائی اور وزیراعلی سندھ کو بھرپور اور رنگا رنگ تقریبات کے منصوبے پر مبارکباد دی۔