سگیاں واطراف میں روڈا زیر انتظام انڈسٹری کے مسائل فوری حل کیئے جائیں، لاہور چیمبر کا مطالبہ

ہفتہ 2 اگست 2025 21:50

لاہور (اُردو پوائنٹ اخبارتازہ ترین - اے پی پی۔ 02 اگست2025ء) لاہور چیمبر کے صدر میاں ابوذر شاد اور سابق صدر محمد علی میاں نے کہا ہے کہ سگیاں اور اطراف میں روڈا کے زیر انتظام انڈسٹری کے مسائل ترجیحی بنیادوں پر حل کیے جائیں تاکہ لوگ یکسوئی سے اپنا کاروبار کرسکیں۔ ان خیالات کا اظہارانہوں نے لاہور چیمبر میں سگیاں انڈسٹریز اونرز ایسوسی ایشن کے 25 رکنی وفدسے خطاب کرتے ہوئے کیا جس کی سربراہی شفیق الزمان کررہے تھے۔

ترجمان کے مطابق وفد میں لاہور چیمبر کے سابق ایگزیکٹو کمیٹی ممبر وسیم چائولہ ، رانا محمد ندیم ،علی شیراز ، میاں عثمان ایڈووکیٹ ، حاجی لیاقت ،ملک عثمان و دیگر شامل تھے۔اس موقع پرشفیق الزمان نے لاہور چیمبر کے عہدیداران کو مسائل سے آگاہ کرتے ہوئے کہا کہ لاہور چیمبر کے علاوہ ہمارے پاس کو ئی ذریعہ نہیں، ڈی سی ریٹ کم کیا جائے یا کمرشل فیس 20 فیصد سے کم کر کے5 فیصد کی جائے۔

(جاری ہے)

وفد نے کہا کہ موجودہ حالات میں کاروبار کرنا پہلے ہی مشکل ہے جبکہ روڈا کی جانب سے سگیاں پل اور اس کے اطراف میں واقع صنعتی یونٹس پر اضافی مالی بوجھ ڈالا جا رہا ہے جس سے صنعتکاری کا مستقبل خطرے میں پڑ گیا ہے۔ میاں ابوذر شاد اور سابق صدر محمد علی میاں نے کہا کہ سگیاں پل اور اس کے گردونواح میں ایک ہزار سے زائد چھوٹی بڑی صنعتیں قائم ہیں جو ملکی معیشت میں اہم کردار ادا کر رہی ہیں تاہم روڈا کے زیر انتظام اس صنعتی زون میں ڈی سی ریٹس عام شرح سے دس گنا زیادہ وصول کیے جا رہے ہیں جو صنعتکاروں کے لیے ناقابل برداشت ہیں۔

انہوں نے کہا کہ وزیراعلیٰ پنجاب سے فوری اپیل ہے کہ زمینی حقائق کو مدنظر رکھتے ہوئے سگیاں اور اس کے اطراف میں ڈی سی ریٹس میں فوری کمی کی جائے۔ ان کا مزید کہنا تھا کہ جب تک روڈا کے زیر انتظام علاقے میں نئے ڈی سی ریٹس کا تعین نہیں ہوتا وہاں موجود تمام صنعتی یونٹس کو تنگ نہ کیا جائے، نہ ہی انہیں بے دخل اور نہ ہی ان کی سیلنگ کی جائے۔