فرانس کی سائیکلسٹ پولین فیرینڈ پریووٹ نے ٹور ڈی فرانس فیمز سائیکل ریس 2025جیت لی

نیدرلینڈز کی سائیکلسٹ ڈیمی وولرنگ ٹور ڈی فرانس فیمز سائیکل ریس میں دوسرے ‘ پولینڈ کی کتارزینا نیویاڈوما تیسرے نمبر پر رہی

پیر 4 اگست 2025 16:39

پیرس(اُردو پوائنٹ اخبارتازہ ترین - این این آئی۔ 04 اگست2025ء)فرانس کی سائیکلسٹ پولین فیرینڈ پریووٹ نے ٹور ڈی فرانس فیمز سائیکل ریس 2025جیت لی۔33 سالہ فرانسیسی سائیکلسٹ پولین فیرینڈپریووٹ 36 سال بعدٹور ڈی فرانس فیمز سائیکل ریس جیتنے والی دوسری خاتون فرانسیسی سائیکلسٹ بن گئی ہیں۔ان سے قبل فرانس کی سائیکلسٹ جینی لونگو نے 1989 میں یہ ریس جیتی تھی۔

فرانسیسی سائیکل سوار پولین فیرینڈپریووٹ نے پہلی مرتبہ ٹور ڈی فرانس فیمز سائیکل ریس کا ٹائٹل اپنے نام کر لیا۔نیدرلینڈز کی سائیکلسٹ ڈیمی وولرنگ ٹور ڈی فرانس فیمز سائیکل ریس میں دوسرے نمبر پر رہیں جبکہ پولینڈ کی سائیکل سوار کتارزینا نیویاڈوما تیسرے نمبر پر رہی۔ ایک ہفتہ تک جاری رہنے والی اس ریس کے نویں اور آخری مرحلے میں فرانس کی سائیکلسٹ پولین فیرینڈ پریووٹ فاتح رہی تاہم مجموعی برتری کی بنیاد پر ریس کا ٹائٹل بھی انہوں نے اپنے نام کیا۔

(جاری ہے)

33 سالہ فرانسیسی سائیکلسٹ پولین فیرینڈپریووٹ نے کہا ہے کہ وہ ٹور ڈی فرانس فیمز سائیکل ریس 2025کا ایڈیشن جیتنے پر بہت خوش ہیں۔انہوں نے کہا کہ ریس کے تمام 9 مراحل سے بہت لطف اندوز ہوئی۔ فرانسیسی سائیکلسٹ پولین فیرینڈپریووٹ نے ریس میں آٹھویں مرحلے سے یلو جرسی حاصل کی تھی جو ریس کے آخری مرحلے تک برقرار رہی۔پولین فیرینڈ پریووٹ نے کہا کہ میں اپنے اولمپک ٹائٹل کے بعد کامیابی کے سفر پر واپس آئی ہوں اور میں آئندہ تین سالوں میں ٹور ڈی فرانس جیتنے کی بھرپور کوشش کروں گی۔