ایشیاء کپ 2025ء : ہربھجن سنگھ نے ٹورنامنٹ شروع ہونے سے پہلے ہی زہر اگلنا شروع کردیا

آپریشن سندور کے بعد ملک کے موجودہ جذبات کو دیکھتے ہوئے ایشیا کپ میں پاکستان کا بائیکاٹ کرنا چاہیے تھا، سابق آف سپنر نے مشورہ داغ دیا

ذیشان مہتاب جمعرات 14 اگست 2025 12:11

ایشیاء کپ 2025ء : ہربھجن سنگھ نے ٹورنامنٹ شروع ہونے سے پہلے ہی زہر اگلنا ..

نئی دہلی (اردو پوائنٹ تازہ ترین اخبار ۔ 14 اگست 2025ء) بھارت کے سابق سپنر ہربھجن سنگھ کی ہمیشہ سے یہی کوشش رہی ہے کہ پاکستان کے خلاف زہر آلود بیانات دے کر لوگوں کی توجہ حاصل کی جاسکے۔

ماضی میں 45 سالہ ہربھجن سنگھ کی شعیب اختر، شاہد آفریدی، ثقلین مشتاق اور محمد یوسف جیسے کئی سابق پاکستانی کھلاڑیوں سے دوستیاں رہی ہیں مگر اس کے باوجود وہ پاکستان کے خلاف زہر اگلنے سے باز نہیں آتے تاہم اب انہوں نے ایشیاء کپ 2025ء شروع ہونے سے قبل ہی ہرزہ سرائی شروع کردی۔

سابق سپنر نے پاکستان کے خلاف کھیلنے پر اپنے ہی بورڈ پر برس پڑے ہیں۔

میڈیا رپورٹ کے مطابق بھارتی سابق اسپنر ہربھجن سنگھ نے ایشیا کپ 2025ء میں پاکستان کے خلاف کھیلنے کے فیصلے پر بھارتی کرکٹ بورڈ (بی سی سی آئی) کو سخت تنقید کا نشانہ بنایا۔

(جاری ہے)

بھارتی میڈیا سے گفتگو کرتے ہوئے ہربھجن سنگھ نے کہا کہ پہلگام کا واقعہ اور پھر آپریشن سندور کے بعد ملک کے موجودہ جذبات کو دیکھتے ہوئے ایشیا کپ میں پاکستان کا بائیکاٹ کرنا چاہیے تھا اور ہمیں ہر سطح پر پاکستان کو بائیکاٹ کرنا چاہیے۔

بھارتی میڈیا کے مطابق ہربھجن سنگھ نے کہا کہ بورڈ کو سمجھنا چاہیے کہ کیا ضروری ہے اور کیا نہیں مگر میرے لیے وہ فوجی زیادہ اہم ہیں جو سرحد پر کھڑا ہے۔

ہربھجن سنگھ نے مؤقف دیا کہ بھارتی فوجی کبھی اپنی جان قربان کر دیتا ہے اور واپس نہیں آتا، ان کی قربانی ہمارے لیے بے مثال ہے۔ اس کے مقابلے میں ایک کرکٹ میچ نہ کھیلنا کوئی بڑی بات نہیں، یہ تو ایک معمولی سی بات ہے۔