ضلعی انتظامیہ ملتان کے زیر اہتمام یوم استحصال کشمیر کے موقع پر سیمینار و آگاہی ریلی

منگل 5 اگست 2025 17:33

ملتان (اُردو پوائنٹ اخبارتازہ ترین - اے پی پی۔ 05 اگست2025ء) ضلعی انتظامیہ ملتان کے زیر اہتمام یوم استحصال کشمیر کے موقع پر سیمینار و آگاہی ریلی کا انعقاد کیا گیا۔ڈپٹی کمشنر وسیم حامد سندھو نے ریلی کی قیادت کی، رضا ہال سے چوک کچہری تک ریلی میں سول سوسائٹی ،تاجروں اور شہروں کی کثیر تعداد نے شرکت کی۔حکومت پنجاب کی ہدایت پر 10 بجے ایک منٹ کی خاموشی اختیار کی گئی ۔

اس موقع پر سائرن بجا کر قومی ترانے کی دھن پر کشمیری بھائیوں سے یکجہتی کا اظہار کیا گیا۔شرکاءسے خطاب کرتے ہوئے ڈپٹی کمشنرنے کہا کہ حق خودارادیت کی جدوجہد میں کشمیری بھائیوں کی قربانیوں کو خراج عقیدت پیش کرتے ہیں۔جموں و کشمیر کی آزادی لوح تقدیر پر ثبت ہو چکی ہے۔وسیم حامد سندھو نے کہا کہ پانچ اگست 2019 کو بھارتی مظالم میں اضافے کے باوجود کشمیریوں کا حوصلہ اور ہمت قابل تحسین ہے،کشمیری بھائیوں کی اس جدوجہد کو دیکھتے ہوئے کشمیر میں آزادی کا سورج جلد طلوع ہوگا۔

(جاری ہے)

انہوں نے کہاکہ برصغیر میں مستقل امن کیلئے مسئلہ کشمیر کا حل ناگزیر ہے۔ ایڈیشنل ڈپٹی کمشنر ریونیو محمد ابو بکر اور ایڈیشنل ڈپٹی کمشنر جنرل محمد سیف سمیت ضلعی حکام ،پی ایچ اے،کارپوریشن،ضلع کونسل،واسا اور ویسٹ مینجمنٹ کمپنی کے اہلکار بھی ریلی میں شریک تھے۔شرکا نے ہاتھوں میں پوسٹرز اور بینرز بھی اٹھا رکھے تھے جن پر کشمیریوں کی جدوجہد آزادی کے حق میں نعرے درج تھے۔