اگر کسی اور ملک سے کھیلنے کی پیشکش ہوئی تو وہ ضرور غور کریں گے، اسامہ میر

بدھ 6 اگست 2025 17:32

اسلام آباد (اُردو پوائنٹ اخبارتازہ ترین - این این آئی۔ 06 اگست2025ء)پاکستانی لیگ اسپنر اسامہ میر نے انگلینڈ میں انٹرنیشنل کرکٹ کھیلنے کے امکان پر لب کشائی کرتے ہوئے کہا ہے کہ اگر کسی اور ملک سے کھیلنے کی پیشکش ہوئی تو وہ ضرور غور کریں گے۔سیالکوٹ سے تعلق رکھنے والے 29 سالہ اسپنر نے حال ہی میں ووسٹرشائر کائونٹی کرکٹ کلب سے تین سالہ ٹی ٹوئنٹی معاہدہ کیا ہے، وہ 2026 میں غیرملکی کھلاڑی جبکہ 2027 سے مقامی پلیئر کے طور پر کھیلنے کے اہل ہو جائیں گے۔

(جاری ہے)

ایک انٹرویو میں اسامہ میر نے کہا کہ کرکٹر کا کام کرکٹ کھیلنا ہے، اگر کسی بھی ملک سے اعلیٰ سطح پر کھیلنے کا موقع ملے تو وہ انکار نہیں کریں گے۔انہوں نے کہا کہ قومی ٹیم میں مسلسل نظر انداز کیے جانے پر انھیں افسوس ہے اور وہ صرف ڈومیسٹک کرکٹ کھیل کر غیر یقینی کا شکار نہیں رہنا چاہتے، اگر بیرون ملک معیاری کرکٹ کے مواقع میسر ہوں گے تو وہ ان سے بھرپور فائدہ اٹھائیں گے۔یاد رہے کہ اسامہ میر پاکستان کی جانب سے 12 ون ڈے اور 5 ٹی ٹوئنٹی میچز کھیل چکے ہیں۔