حیدر علی کی گرفتاری پر مانچسٹر پولیس کا ردعمل سامنے آگیا

قومی کرکٹر کو مانچسٹر پولیس کی جانب سے گرفتار کرکے 3 دن تک حراست میں رکھے جانے کا انکشاف

ذیشان مہتاب جمعہ 8 اگست 2025 12:59

حیدر علی کی گرفتاری پر مانچسٹر پولیس کا ردعمل سامنے آگیا

مانچسٹر (اردو پوائنٹ تازہ ترین اخبار۔ 8 اگست 2025ء ) قومی ٹیم کے نوجوان بیٹر حیدر علی کی گرفتاری پر گریٹر مانچسٹر پولیس کا ردعمل سامنے آگیا۔

مانچسٹر پولیس نے اپنے بیان میں کہا کہ "سوموار 4 اگست 2025ء کو ریپ کی رپورٹ موصول ہونے کے بعد ہم نے ایک 24 سالہ شخص کو گرفتار کیا ہے۔ یہ الزام لگایا گیا ہے کہ یہ واقعہ بدھ 23 جولائی 2025ء کو مانچسٹر کے ایک احاطے میں پیش آیا۔

اس شخص کو مزید پوچھ گچھ کے لیے ضمانت پر رہا کر دیا گیا ہے۔ متاثرہ کو افسران کی مدد حاصل ہے۔"

Greater Manchester Police regarding Haider Ali "After receiving a report on Monday 4 August 2025 of a rape, we have arrested a 24-year-old man. It's alleged that the incident occurred on Wednesday 23 July 2025 at a premises in Manchester. The man has since been bailed pending…
— Saj Sadiq (@SajSadiqCricket) August 8, 2025

واضح رہے کہ پاکستان کے نوجوان کرکٹر حیدر علی کو برطانیہ میں گرفتاری کے بعد رہا کر دیا گیا ہے۔

سماء نیوز کی رپورٹ کے مطابق حیدر علی کو مانچسٹر پولیس کی جانب سے گرفتار کیا گیا۔

(جاری ہے)

ان کیخلاف خاتون سے مبینہ زیادتی کے الزام کی تحقیقات کی جا رہی ہے۔

بتایا گیا ہے کہ انہیں 3 روز قبل مانچسٹر پولیس نے حراست میں لیا تھا۔ برطانوی پولیس کی جانب سے حیدر علی سے کرمنل تفتیش کی جا رہی ہے، انہیں ضمانت پر رہا کر دیا گیا تاہم ان کے برطانیہ سے باہر جانے پر پابندی ہو گی۔ مانچسٹر پولیس نے واضح کیا ہے کہ تحقیقات مکمل ہونے تک حیدر علی برطانیہ سے باہر نہیں جا سکتے۔

پاکستان کرکٹ بورڈ نے بھی اس حوالے سے تصدیق کر دی ہے۔

پی سی بی کی جانب سے جاری بیان کے مطابق حیدر علی کو برطانیہ میں مکمل قانونی معاونت فراہم کی گئی ہے۔ پاکستان کرکٹ بورڈ برطانوی قوانین کا مکمل احترام کرتا ہے اور چاہے گا کہ جو بھی تفتیش کا عمل شروع کیا گیا ہے، وہ اپنے قانونی اور منطقی انجام تک پہنچے۔

اسی اثناء میں پی سی بی نے حیدر علی کو معطل کرنے کا فیصلہ کیا ہے جبکہ تمام قانونی کاروائی مکمل ہو جانے اور مکمل حقائق سامنے آنے کے بعد ہی پی سی بی کی جانب سے مزید کوئی کاروائی عمل میں لائے جائے گی۔ اس حوالے سے تب تک پی سی بی کی جانب سے مزید کوئی بیان جاری نہیں کیا جائے گا۔